شهدت قناة MBC مصر حوارًا ساخنًا بين الإعلامي عمرو أديب والنائب أحمد دياب، رئيس رابطة الأندية، حول أزمة خصم النقاط من النادي الأهلي ثم التراجع عنها، وهي الواقعة التي أثارت جدلًا واسعًا بين الجماهير.
عمرو أديب بدأ بسؤال مباشر وصريح: “عندي سؤال أخير ومش عايز تفاصيل، ده لله وللتاريخ وحضرتك موجود يجب تسجلها للناس.. ما الذي حدث؟ هل بالفعل رابطة الأندية قالت إن الأهلي يتخصم منه ثلاث نقاط الآن وثلاث نقاط آخر الموسم، وجت رابطة الأندية غيرت القرار بعدها بيومين؟ هل الكلام ده حصل؟”
أحمد دياب رد قائلاً: “هقول لحضرتك اللي حصل لأن ماعندناش غير الوضوح والصراحة.. بعد انتهاء الجولة، صدر قرار باعتبار الأهلي خسران وخصم منه الثلاث نقاط.”
وأضاف: “بعد تقدم الأهلي بشكوى وعرضها على مجلس إدارة الرابطة، وده مكنش يومين ولا حاجة، القرار طلع بعد أسبوعين من القرار الأولاني، وصدر قرار جديد بتخفيض العقوبة باعتبار الأهلي خسران فقط، مع العقوبات المالية، وتم إلغاء خصم النقاط.”
فسأله عمرو أديب للتأكيد: “يعني فعلاً صدر قرار بالخصم، ورجع مجلس إدارة الرابطة صدر قرار بتخفيضها؟”
دياب أجاب: “ده قرار صدر من لجنة المسابقات، ومن ثم قرار آخر صدر من رابطة الأندية، والقرارين بموجب بنود اللائحة المعتمدة من 18 نادي.”
سأله أديب مجددًا: “يعني القرارين صح؟”
فقال دياب: “صحيح بقى أو لأ، القرارين قانونيين 100% طبقًا للمادة.. وحق الاستئناف عليهم سواء من اللجان القضائية أو المحكمة الرياضية وارد تمامًا، لكن صدور القرار نفسه سليم.”
وتابع عمرو أديب منتقدًا: “طيب إزاي هي طلعت كده بخصم ورجعتوا قولتوا أصل اللائحة اتغيرت؟ مفيهاش خصم الثلاث نقاط؟”
أحمد دياب نفى ذلك بوضوح: “لا الحقيقة الرابطة مقلتش كده خالص، ده الكلام اللي أثير وكان غلط.. اللائحة دي متغيرة من قبل بداية الموسم ومفيش حاجة اتغيرت في الموسم ده، والأندية كلها مضت عليها.”
وأكمل: “بشكل عام، بعد كل جولة بتنزل عقوبات بناءً على تقارير المراقب والحكام من لجنة المسابقات، لكن لما بيحصل شكاوى أو احتجاجات من القرارات دي، في قرارات بتعرض على لجنة المسابقات وبيتم تخفيضها، وفي قرارات بتُعرض على مجلس الرابطة، فبند تخفيض القرارات موجود وبيحصل في العالم كله.”
واختتم أحمد دياب حديثه قائلًا: “خلينا نقول إن أي قرار في الكرة آه هي لوائح، لكن في الآخر وجهات نظر.. القرار بيطلع طبقًا للائحة، مرة يصب في مصلحة النادي ده أو نادي تاني، مش من باب الموازنة، لكن من باب إن كل نادي بيحافظ على مصالحه وبيشوف اللي يحقق له ده، فبالتالي بيبقى في اعتراضات أو خطوات للاستئناف على هذه القرارات.”
