خرج أحمد حسام ميدو، نجم الزمالك السابق، بتصريحات نارية خلال ظهوره في بودكاست “ابن كارك” مع الإعلامي كريم خطاب، مؤكدًا أنه لم يفكر يومًا في الانتقال للنادي الأهلي، وأن كل ما أُثير حول هذا الأمر مجرد “اختراعات” لا أساس لها من الصحة.
وقال ميدو:”عمري ما فكرت أروح الأهلي، ولا حتى كنت قريب منهم، وطول عمري عارف إن ده مش مكاني”.
وعند سؤاله عن تصريحات عدلي القيعي، التي زعم فيها أن ميدو كان لديه رغبة في الانضمام للأهلي بعد عودته من أوروبا، رد ميدو بحسم:”أنا بكن كل احترام وتقدير للمهندس عدلي القيعي، لكن الكلام اللي قاله مش حقيقي، وهو عارف إنه مش حقيقي، وبزعل لما بشوف ناس كبار في السن بتكدب”.
وأضاف ميدو:”الناس دي لازم أولادها تحميهم.. في مرحلة عمرية معينة المفروض ميطلعوش في التليفزيون، لأنهم بيغلطوا في الكلام وبيضيعوا تاريخهم، ولو أنا حكيت كل اللي أعرفه بوقائع، أحفادهم مش هيعرفوا يبصوا في وش الناس”.
واستطرد قائلاً:”كابتن شوبير شاهد على إن الخطيب وياسين منصور كلموني علشان أروح الأهلي، ووقتها قلت لهم: أنا آسف.. أنا زملكاوي ومش هقدر”.
وكشف ميدو عن محاولة سابقة من الأهلي لضمه وهو صغير، قائلاً:”كابتن علاء عبد الصادق قعد معايا وكانوا عايزين ياخدوني أنا وجمال حمزة بعد ما حسام حسن وإبراهيم راحوا الزمالك، وقلت ساعتها لجمال: مستحيل ألعب للأهلي”.
وأنهى ميدو تصريحاته برسالة حادة:”أنا آسف لو كلامي فيه قسوة، بس الكذب عيب.. واللي بيقوله عدلي القيعي ده اختراع. يا ريت متوصلش لمرحلة إنك تكون أداة أو مصد، سيب الكلام ده للي أصغر منك”.
