شهدت حلقة مثيرة من برنامج الإعلامي عمرو أديب على قناة MBC مصر مواجهة قوية مع النائب أحمد دياب رئيس رابطة الأندية، بعد إثارة الجدل حول المادة الخاصة بتحصين قرارات الرابطة، ومنع الطعن عليها.
عمرو أديب قال: “المادة بتاعه التحصين دي، وإن أي قرار يصدر من الرابطة مينفعش يتظلم فيه أو الشكوى فيها.. انتوا مش عايزين تراجعوها؟ هو في أي هيئة تبقى محصنة كده؟”.
ورد أحمد دياب قائلاً: “عايزين نوضح إن مثلًا المادة 63 دي موجوده في لائحة الدوري الإماراتي بنفس الرقم، وفي اتحادات تانيه عادي، لكن هنا التحصين مش من اللجان القضائية.. بمعنى إن من حق المحكمة الرياضية أو لجنة التظلمات إنها تاخد قرارات وتنفذ، ودي موجوده في لائحة رابطة الأندية”.
سأله عمرو أديب: “يعني لو أنا عندي مشكلة معاك لازم أروح برا؟”، فرد دياب: “لا يا فندم، ممكن حضرتك تروح للجنة القضائية اللي موجوده في اتحاد الكرة”.
لكن عمرو أديب تابع حديثه منتقدًا: “طيب ما هو لجنة التظلمات في اتحاد الكرة قالت إنها مش هتقدر تقرب منك لأنك محصن”، ليكتفي دياب بالرد: “أنا هستأذن حضرتك مش هعقب على القرار ده”.
عمرو أديب قال بنبرة حادة: “لا لا لا تعقيب إيه؟ هو سر! أنا بقول لحضرتك إن لجنة التظلمات قالت إن إيدها مغلولة ومش هتقدر تقرب من القرار لأنك محصن، أنا بسأل حضرتك لو أنا عندي مشكلة معاك أروح لمين لو أنت محصن؟”.
أحمد دياب وضّح: “تروح للجان القضائية في اتحاد الكرة، ولو معجبكش القرار تروح للمحكمة الرياضية، والاتنين موجودين في لائحة الرابطة، سواء لجنة الاستئناف أو المحكمة الرياضية، وأحكامهم نافذة”.
عمرو أديب أكمل: “إحنا عندنا واقعة أهو، إن نادي بيراميدز عايز يروح للخارج وممكن النشاط يتوقف في تهديد بكده، أو إنه ما يعلنش اسم بطل الدوري.. طيب ليه ما نحلها جوا؟ ما أنا كل ما هروح للجنة التظلمات في مصر هتقولي مش هقدر أعمل حاجة لأن القرارات محصنة”.
ورد دياب قائلاً: “كده كده اللائحة هتتناقش مع الأندية للموسم الجديد، لكن أنا بقول لحضرتك إن في بند في لائحة 58، إن اللجان القضائية تناقش وتاخد أي قرار ويتم تنفيذه، وأنا مش حابب أتكلم في القصة دي لأنها قضية لها ثلاث أطراف، وكل طرف ممكن يروح للمحكمة الرياضية”.
وأضاف: “وزي ما قلت لحضرتك، إن المادة 63 دي موجودة في اتحادات كتير، منها الدوري الإماراتي”، ليرد عمرو أديب: “إيه تاني غير الدوري الإماراتي؟”، فأجاب دياب: “موجودة في لائحة كأس العالم للأندية”.
عمرو أديب قال ساخرًا: “بس دي لائحة بطولة بتتلعب في شهر، مش زي الدوري”، وأضاف: “وأنا بقول لحضرتك إن ممكن يحصل تصعيد من بيراميدز والنشاط مهدد إنه يتجمد، فليه نروح برا ويحصل كل ده؟ ما البند ده يتعدل ونحل مشاكلنا هنا”.
وختم أحمد دياب الرد قائلاً: “لا مفيش حاجة اسمها تجميد النشاط الرياضي في مصر، لأن أي قرار صدر هو قانوني، وزي ما قلتلك في بند في لائحة الرابطة يسمح للجان القضائية إنها تناقش وتصدر أي قرار عكس الرابطة ويتم تنفيذه، هي والمحكمة الرياضية”.
