قال جمال عبدالحميد، نجم الزمالك السابق، إن زيزو خذل الزمالك وجماهيره، وقرر الانتقال للأهلي بعد ما رفض يجدد مع ناديه، وده خيانة واضحة للنادي اللي صنع اسمه.
وأكد عبر برنامج “بلس 90” على قناة النهار: “اللي بيحصل دلوقتي إن اللوائح في الكرة المصرية بتتغير علشان زيزو يلعب مع الأهلي في كأس العالم للأندية! طب إزاي؟ هو ده احترام لجمهور الزمالك؟”.
وأضاف: “زيزو ماحترمش الزمالك ولا جمهوره، وكان بيماطل في التجديد، ومفيش أي عروض رسمية جتله، وكلها كانت شغل سماسرة، بينفخوا أرقام وشائعات علشان يضغطوا على الإدارة، والزمالك في الآخر وقع معاه 3 سنين، وشال الشرط الجزائي، لكنه ضحك على المجلس ورحل ببلاش”.
وتابع: “السماسرة دلوقتي بيلعبوا على دماغ أي نادٍ حتى لو عنده إدارة قوية، وواحد منهم طلع قال علنًا إن في خطة كوبري علشان زيزو يروح الأهلي! طب فين التحقيق؟”.
وواصل: “إحنا بعنا إمام عاشور بـ95 مليون جنيه، وكان عايز يطلع أوروبا، ورجع بعدها الأهلي في نفس الموسم، وده أكبر دليل إنه كان كوبري، والزمالك مش بيقف على لاعب.. ولا حتى الأهلي، المهم النظام والكرامة”.
واختتم: “بيراميدز بيلعب باسم مصر، وعايزين يأجلوا له ماتش علشان حد تاني؟ طيب لما الأهلي والزمالك كانوا في نهائي أفريقيا محدش كان بيقول كده! اللوائح عندنا بتتغير بالمزاج، ومش لمصلحة الكرة”.
