وجّه خالد الغندور، نجم الزمالك السابق، انتقادات نارية لما وصفه بـ”العشوائية القانونية” في إدارة ملف أزمة مباراة الأهلي والزمالك، متسائلًا عن سبب التأجيل المتكرر لقرار لجنة التظلمات رغم وضوح الأمور من البداية.
وقال الغندور: “ليه القرار اتأجل أكتر من مرة؟ مرة يقولوا مستنين ورق الزمالك، ومرة ورق الأهلي، ومرة تانية يقولك الفرق بين القرار الأول والتاني مش واضح! وفي الآخر، يقولوا القرار محصن وماقدروش يعملوا حاجة. طب ما انت عارف إنه محصن من أول يوم!”.
وتابع: “مافيش حاجة في الدنيا اسمها قرار محصن… أي قرار قابل للطعن ويمر بتدرجات التقاضي، واللي بيحصل ده عبث. أيام قرار كهربا، لجنة التظلمات قالت الاستئناف لا يوقف اللاعب، لكن في حالة إمام عاشور قالوا العكس، يعني مافيش ثوابت ولا فهم حقيقي للقانون”.
وأضاف الغندور: “الأهلي لما لجأ للمحاكم المدنية في قضية كهربا، الأمور عدّت، لكن لما الشيبي راح للمحاكم، نفس الناس اعترضت! إزاي؟ محدش فاهم حاجة فعلاً”.
وأشار نجم الزمالك السابق إلى أنه درس في كلية حقوق عين شمس لمدة عامين قبل أن يتحول إلى مجال الكرة، قائلاً: “أنا فاهم يعني إيه قانون، ومينفعش حد يبقى ليه مصلحة أو علاقة بنادي ويتولى الفصل في نزاع يخص النادي ده. لازم يتنحى علشان ميبقاش في شبهة مجاملة أو تضارب مصالح”.
وختم الغندور حديثه قائلاً: “اللي بيحصل مش بس بيفضح اللوائح، ده بيضرب مصداقية المنظومة كلها… لازم يكون في مراجعة قانونية حقيقية عشان الناس تصدق إن في عدالة”.
