شهدت قناة الأهلي مواجهة ساخنة بين الإعلامي أحمد شوبير، وحارس الأهلي الأسبق ومدير الكرة السابق خالد بيبو، بعد اتهامات وجهها شوبير للجهاز الفني والإداري السابق بشأن أزمة تجديد عقود بعض لاعبي الفريق.
وقال شوبير في مداخلته عبر قناة الأهلي:”أنت متهم يا كابتن خالد بيبو إنك مجددتش لعدد كبير جدًا من اللاعبين في الأهلي، وإحنا دلوقتي بنواجه أزمة كبيرة سواء مع رامي ربيعة أو حمزة علاء وغيرهم”.
ورد عليه خالد بيبو بتأكيده أن هذه الاتهامات غير دقيقة، قائلاً:”لا طبعًا، مين قال الكلام ده؟! كان في مفاوضات مع كل اللاعبين اللي عقودهم كانت قريبة من الانتهاء في الأهلي، لكن بوضوح، الأمور مبقتش زي زمان.. يعني مش هتقعد مع لاعب يقولك همضيلك على بياض، الكلام ده مش موجود خلاص”.
وأضاف بيبو:”لازم الناس تفهم إن المفاوضات دلوقتي بقت معقدة ومش سهلة، ومش كل لاعب هيقعد قدامك وهيقولك امضي وخلاص، وعلشان أوضح أكتر، هضرب مثال بحمزة علاء”.
وتابع:”العقد الأولاني اللي كان عنده، كان في قطاع الناشئين، وأنا اللي صعدته للفريق الأول، وكان لازم يحصل تعديل في عقده بعد ما بقى الحارس رقم تلاتة بعد علي لطفي، المهم من سنة قولتله تعالى نقعد نعدل ونمدد العقد”.
واستكمل مدير الكرة السابق حديثه:”حمزة علاء كان بيتهرب من الجلوس معانا، وكل مرة أقول له تعالى يقولي بابا وكيلي، أقول له هاتهم، يقول لي معلش أصله تعبان، ومرة تانية بيعمل عملية، ومرة عنده ظروف، وقعدت السنة كلها مش عارف أقعد مع والده ولا معاه، مفيش مرة واحدة تم فيها اجتماع”.
وأضاف بيبو:”حمزة علاء كان بيرفض الجلوس للتجديد، ولو عنده كلام تاني يطلع يقوله، أنا بتكلم بمنتهى الشفافية على الهواء، والناس داخل النادي كانت بتقول مايروحش الأولمبياد، لكن كابتن محمود الخطيب رفض ده تمامًا، وقال ده ابن الأهلي ولازم نقعد معاه مرة واتنين وتلاتة، لكن مش هنحرمه من اللعب في الأولمبياد”.
واختتم بيبو كلامه قائلًا:”أنا حاولت معاه سنة كاملة وكان بيرفض الجلوس علشان يجدد، وخد عندك نفس النموذج ده اتكرر مع لاعيبة تانية، فمحدش يقول إننا مقصرين أو محاولناش، كل اللي نقدر عليه عملناه”.
شاهد
