قال جمال عبدالحميد نجم الزمالك السابق، إن في لوائح بتتغير مخصوص علشان لاعب يشارك في كأس العالم للأندية، في إشارة للاعب زيزو، وسأل: “هو ينفع يتأجل نهائي كأس مصر بين الزمالك وبيراميدز، وفي نفس الوقت الجولة الأخيرة في الدوري تتلعب يوم 4 أو 5 يونيو؟”
وأضاف جمال عبدالحميد عبر برنامج بلس 90 على قناة النهار: “دايمًا بيقولوا الزمالك مليان أزمات، بس رغم كده خدنا بطولات كتير، محلية وقارية، والقطبين الأهلي والزمالك دايمًا ليهم قيمة ومكانة، وكل اللعيبة بتحلم تروح ليهم”.
وتابع: “لما كنت في مجلس الإدارة، كنا مأجرين محلات بـ750 ألف جنيه في السنة، وكان في محلات بـ120 جنيه بس! ورغم الأزمة المالية، كنا بنحاول نحل المشاكل، ومع ذلك كان في ناس بتهاجمنا وبتشتم المجلس بعد ما نجحنا في إشراك فريق اليد في البطولة العربية”.
وأكمل: “ممدوح عباس أخد فلوسه ورجع طالب بيها تاني، وكان ممكن نتحط تحت طائلة القانون، وإحنا مكناش بنعرف ننام من كتر المشاكل. وربنا يكون في عون المجلس الحالي، بس بقولك مفيش حد هييجي زي مرتضى منصور، ومش بفكر أرجع للانتخابات تاني”.
وأوضح: “لو كنت مسئول دلوقتي، كنت جددت لـ شيكابالا وعبدالله السعيد، وكمان دونجا وعواد وناصر منسي، كلهم لعيبة لازم يفضلوا في النادي”.
واختتم كلامه: “لو هاختار بين رمضان صبحي وإبراهيم عادل، هاخد رمضان، وجوميز أفضل من ميكالي، وأتمنى رجوع طارق حامد. وبالمناسبة محمود الخطيب من أعظم لاعيبة مصر، ومرتضى منصور أحسن رئيس جه الزمالك، ومفيش زيه. وكابتن أبورجيلة له فضل كبير ومش مفروض يبعد عن النادي”.
