قال حسام المندوه، أمين صندوق نادي الزمالك، إن لجنة التخطيط مكملة في شغلها داخل النادي، ومفيش أي نية لرحيلها زي ما البعض ردد خلال الساعات اللي فاتت.
وأكد في تصريحات عبر برنامج “يا مساء الأنوار” مع مدحت شلبي على قناة MBC مصر: “اللجنة بتضم ناس من أبناء الزمالك الأوفياء، وقدموا خطة محترمة هتتناقش قريب علشان تتحول لواقع يخدم النادي”.
المندوه فجّر مفاجأة، وقال إن المجلس سدد حوالي 350 مليون جنيه ديون وغرامات ومستحقات قديمة، منها مستحقات لمدربين زي باتشيكو وبوطيب، وتسويات قانونية مع بيسيرو وجروس، وفي مفاوضات شغالة دلوقتي مع جوزيه جوميز علشان نخلص ملفه.
وكشف كمان إن المجلس الحالي ملوش علاقة بأي ديون، بالعكس استلم النادي وحساباته متحجزة عليها بقرارات من المحاكم، وسددوا لحد دلوقتي بين 7 و8 مليون دولار في قضايا دولية.
وبخصوص أزمة مباراة الأهلي والزمالك، قال: “إحنا قدمنا ردنا للمحكمة الرياضية، وأكدنا إن الزمالك كان حاضر.. والفريق التاني هو اللي ملعبش.. منتظرين نشوف هل العقوبة تبقى 6 نقاط ولا 3، بس لسه القضية ماشية”.
المندوه كمان فتح ملف نتائج فرق الصالات، وقال: “بصراحة إحنا مش راضيين، وفي إعادة تقييم شامل عشان نرجّع الفرق دي للمنافسة تاني”.
وأكد إن فرع أكتوبر ساعد في حل جزء من الأزمات، لكن المطلوب دلوقتي هدوء وتكاتف علشان الزمالك يعدي المرحلة الصعبة.
وختم كلامه بنفي تام عن استقالة الكابتن حسين لبيب، وقال: “هو عنده شوية مشاكل صحية بسيطة، بس موجود ومكمل، ومفيش أي كلام عن استقالته، وإحنا بنشتغل كفريق واحد وكلنا هدفنا نعدي بالنادي من الظروف دي”.
