فتح خالد الغندور، نجم الزمالك السابق، النار مجددًا على رابطة الأندية، منتقدًا ما وصفه بازدواجية المعايير في تطبيق اللوائح، خاصة فيما يخص خصم النقاط في حالات الانسحاب.
وقال الغندور:”نمرة تلاتة أهم.. الزمالك انسحب ٣ مرات قدام الأهلي، واتخصم منه ٣+٣ نقاط في نهاية الموسم. انسحب أيام كابتن حسين لبيب، ومرتين أيام مرتضى منصور، وفي كل مرة الأتوبيس كان بيروح ويدخل الحمام، وبرضه اتطبق عليه اللائحة”.
وأضاف:”الرابطة أيام عمرو زكي غيرت حتى لائحة الكلام بالشفايف! يعني في مرة قالك اللاعب اتكلم، تاني سنة نفس التصرف قالوا لا ده مالوش لازمة، غيرنا اللائحة”.
وتابع الغندور ساخرًا من مبررات ما وصفه بالانسحاب الأخير:”دلوقتي بيقولوا غيرنا اللائحة، وبقينا نحكم حسب الظروف القاهرة! يعني فريق يقرر ينسحب يوم الماتش، ويقولوا أصل مافيش حكام. طب مافيش حكام إزاي؟ جُم حكام سعوديين، بس كانوا اتنين بس، لا حكم تالت ولا فار، فين الطاقم الكامل؟!”.
وأوضح:”التحكيم الأجنبي مش بيبقى اتنين بس، لازم يكون فيه تلاتة في الملعب واتنين على الفار، يعني خمسة أقل حاجة، وساعات بيبقوا سبعة. كمان الاتنين اللي جم من السعودية مش بيحكموا في الدوري السعودي أصلاً، كلهم هناك حكام أجانب!”.
وختم الغندور كلامه بالتساؤل عن حقيقة تغيير اللائحة بالفعل، أم أن المسألة تُدار بمزاجية وازدواجية واضحة في القرارات.
