كشف شيكابالا نجم الزمالك، في بودكاست “ذا ميكر”، عن الدور الخفي والكبير اللي بيقوم بيه ممدوح عباس لخدمة الزمالك من غير ما يطلع يتكلم أو ياخد شو إعلامي.
وقال شيكابالا: “مستر ممدوح عباس بيعمل حاجات كتير أوي ومحدش يعرف، وبيصرف أرقام مهولة من غير ما يقول، وبيساعد في حاجات مصيرية.. الراجل ده عايش علشان الزمالك وشهادتي فيه مجروحة”.
وأضاف: “بيكلموه يقولوله في لاعب لازم يسافر يعمل عملية.. هو اللي بيسفره وبيقعده شهرين ونص بره مصر على حسابه، وبيجيب أجهزة للنادي ويدفع غرامات بملايين في كوارث ناس تانية عملتها”.
وتابع: “أمنيته الوحيدة إنه يتفرج على الزمالك وهو بيكسب، وده اللي بيخليه مستمر في الدعم رغم الهجوم عليه”.
وأكد شيكا: “الناس بتقول الأستاذ ممدوح عباس هو رئيس الزمالك.. لأ يا جماعة، كابتن حسين لبيب هو الرئيس، لكن في ناس كتير بتساعد من ورا الكواليس زي ميدو ومستر محمود الجمال ومدحت العدل والجنايني ومستر ممدوح”.
وختم كلامه: “الناس بتقول الكلام ده علشان يطفشوا اللي بيساعدوا الزمالك، لكن الحقيقة إن الزمالك محتاج كل الناس دي”.
