شن الكابتن طارق يحيى، نجم الزمالك السابق، هجومًا ناريًا على اللاعب أحمد سيد زيزو، بعد تأكد انتقاله إلى الأهلي، مشيرًا إلى أن طريقة رحيله كانت غير لائقة ولا تحترم جماهير النادي الذي صنع نجوميته.
وقال طارق يحيى، في تصريحات عبر قناة MBC مصر:”نزول زيزو للمران؟ ما كان من بدري يا بني! هو يصح أصلاً تشتكي الزمالك علشان مستحقات؟ مستحقات إيه اللي تخليك تشتكي النادي اللي عملك وصنع اسمك!”
وأضاف:”إحنا لحد النهارده لينا فلوس من أيام ما كنا بنلعب، بس عمرنا ما فكرنا نشتكي نادينا. كان المفروض زيزو يبقى صريح، يطلع يقول لجماهير الزمالك: أنا ماشي، وخلاص.”
وتابع يحيى:”إيه الصعب إنك تكلم ميدو أو كابتن أحمد سليمان أو كابتن حسين السيد، تقولهم أنا ليّا فلوس وعايزها؟ لكن تقعد تقول للناس (أنا قاعد وممضتش) وإنت مخلّص كل حاجة؟!”
وكشف:”حازم إمام قال إن زيزو أكد له إنه ما مضاش للأهلي، وفجأة نلاقيه في السفارة الأمريكية بيستخرج تأشيرة علشان كأس العالم مع الأهلي!”
وواصل طارق يحيى انتقاده:”والده بيقول إن ابنه مكنش هيجدد إلا برحيل مجلس الإدارة؟! هو ده كلام؟ طب امشي يا عم، أو روح أي حتة، بس مش بالشكل ده!”
واختتم بغضب:”فلوس إيه اللي بتفكر فيها؟ ينعل الفلوس يا أخي! هتعملها كده كده، بس مش على حساب جماهير الزمالك اللي كانت شايفاك رمز!”
