أكد طاهر أبو زيد، نجم الأهلي ووزير الرياضة الأسبق، عبر قناة MBC مصر، إنه ضد عدم ذهاب الأهلي لمباراة القمة، وكان شايف إن الفريق لازم يلعب حتى بحكام مصريين، لكن أشار إن المشكلة أكبر من مجرد موقف الأهلي.
قال: “الأهلي ممكن يكون أخطأ في القرار، بس المنظومة كلها خاربة، لما تبقى في لوائح ومحدش بيطبقها تبقى حاجة صعبة جدًا”.
وفي رده على سؤال الإعلامي شريف عامر “لو كنت وزير الشباب والرياضة كنت عملت إيه؟”، قال طاهر: “كنت طبقت اللائحة فورًا”.
وعن نوع اللائحة، أوضح: “مظنش في حاجة اسمها خصم 3 نقاط بس، اللائحة واضحة من بداية الموسم، والأندية مضت عليها، لكن المشكلة دلوقتي إن مفيش شفافية من المسؤولين اللي صنعوا الأزمة دي”.
وأشار: “الأهلي اتقاله إن في حكام أجانب، ولما ده ما حصلش حس إنه اتخدع وده أثر على كرامته، لكن رغم كده كان لازم يروح المباراة حتى لو بحكام مصريين”.
واختتم: “الأهلي نادٍ كبير وعنده مسؤولية وطنية، وغيابه عن القمة كان قرار جانبه الصواب”.
