ليه التظلمات سكتت كل الوقت ده؟.. إبراهيم عبدالجواد يفضح كواليس قرار عدم خصم ثلاث نقاط الأهلي

كشف الإعلامي إبراهيم عبدالجواد عبر قناة أون سبورت كواليس قرارات لجنة التظلمات في أزمة مباراة القمة بين الزمالك والأهلي، وقال: “الكلام اللي هقوله ده على لسان المسؤولين مش من عندي.”

أوضح إن قرار خصم 3 نقاط واعتبار الأهلي منسحب طلع في البداية من لجنة المسابقات برئاسة طه عزت، لكن المفاجأة إن قرار إلغاء الخصم والإبقاء على فوز الزمالك بس، جه من مجلس إدارة رابطة الأندية مش من لجنة المسابقات.

وأكد إن مجلس إدارة الرابطة استند للمادة في اللائحة اللي بتديهم الحق ياخدوا أي قرار نهائي بدون ما حد يطعن عليه أو يتظلم.

وعن دور لجنة التظلمات، قال: “النهارده اللجنة رفضت كل التظلمات وقالت بالنص إنها مش قادرة تعمل حاجة بسبب تحصين القرار وفقًا للائحة اللي الأندية وافقت عليها بنفسها.”

وسأل عبدالجواد: “ليه اللجنة ما قالتش الكلام ده من أول جلسة؟!”
وأضاف: “المسؤولين قالوا لنا إن أول جلسة كانت استماع، والتانية لتلقي الأوراق، والتالتة اللي حصلت النهاردة كانت للاستماع لرئيس لجنة المسابقات.”