أكد عمرو أدهم، عضو مجلس إدارة نادي الزمالك، إن النادي قرر يلجأ للمحكمة الرياضية الدولية (كاس) مش عشان الثلاث نقاط، لكن عشان يرسخ مبدأ العدالة ويرد على البنود الغريبة اللي ظهرت في لائحة رابطة الأندية.
وقال “أدهم” في تصريحات نارية مع الصقر أحمد حسن على قناة dmc:
“إزاي يبقى في بند بيحصن قرارات الرابطة ضد الاستئناف؟!.. دي أول مرة نشوف حاجة زي كده في قانون رياضي!”
وأضاف: “حتى لو الأندية وقعت على اللائحة، ده مش معناه إن البند قانوني، إحنا مش بنسكت على الظلم، والزمالك مش بيطالب بحق نفسه بس، إحنا بندافع عن حق كل الأندية في التقاضي”.
وأكد عضو مجلس الزمالك إن لجنة التظلمات مش كان المفروض تتأخر في الرد، وقال: “لو شايفين نفسهم مش مختصين، ليه التأجيل وليه استدعاء المحامين؟!”.
وتكلم كمان عن الموسم الجديد، وقال إن لجنة التخطيط شغالة على تدعيمات قوية، ووعد الجمهور بصفقات على أعلى مستوى، تطمن جماهير الزمالك اللي صبرت كتير.
واختتم حديثه بتطمين الجمهور على رئيس النادي، وقال: “حسين لبيب بخير، وكان بيعاني من شوية إرهاق بس، وهيبقى موجود قريب إن شاء الله”.
