ملخص تصريحات جوزيه بسيرو عن رحيله من الزمالك وكواليس صادمة واسرار تكشف لأول مرة – فيديو
قال بيسيرو في مداخلة على أون سبورت إنه ماعندوش إجابة واضحة عن سبب رحيله عن الزمالك، وأكد إن الإمكانيات داخل النادي ماكنتش كافية لتحقيق الفوز باستمرار. وأوضح إن أزمة زيزو كانت نقطة التحول، واللاعب مكانش بيلعب بكامل تركيزه، ورغم محاولات الجهاز الفني، لكن التأثير كان واضح جدًا.
أضاف بيسيرو إنه قعد مع زيزو وحاول يقنعه بالتجديد، لكن التفاوض كان بيتم من أطراف تانية، وإن زيزو شاف إن مصلحته مع الأهلي اللي كانت مفاوضاته مفتوحة معاه. وأكد إن غياب زيزو في الكونفدرالية أثر على الفريق، وكان قرار إداري مش فني. وأكد إنه كان يتمنى وجود زيزو في التشكيل لأنه كان ممكن يسجل هدفين.
أوضح بيسيرو إن الإعلام في مصر بيضغط على اللاعبين بشكل هيستيري، خصوصًا في صراعات زي الأهلي والزمالك. وقال إن الزمالك خسر بسبب غياب التركيز، وغياب بعض العناصر زي زيزو، والأخطاء الفردية، والضغط الجماهيري والإعلامي، وده كله كان ضد الفريق وقتها.
أكد بيسيرو إن الزمالك محتاج من 4 لـ5 صفقات، منهم اتنين في الدفاع واتنين في الوسط أو الهجوم، وطلب صفقات معينة لكن مش هيقول عليها دلوقتي. وشدد إن الفريق عنده لاعبين مميزين لكن كانوا مصابين في وقت صعب. وأكد إن فتوح وشحاتة وشيكابالا من أهم العناصر.
عن شيكابالا، قال بيسيرو إنه عنصر مهم جوه الملعب وبره، وعنده تأثير إداري كبير، وبيعرف يوصل وجهة نظر المدرب للاعبين. وأكد إن عبد الله السعيد من أهم لاعبي الزمالك ولازم الإدارة تجدد له فورًا.
أما عن مركز الحراسة، فأكد إن الزمالك عنده أفضل حراس في مصر زي عواد وصبحي، ومش محتاج تدعيم في المركز ده. وشدد إن الأهلي وبيراميدز عندهم ميزانيات أكبر بكتير من الزمالك، وده بيأثر على قدرتهم على ضم اللاعبين.
أضاف بيسيرو إن رغم كل الصعوبات المالية، لاعبي الزمالك بيقدموا أداء محترم عشان الجمهور، وإن الأهلي وضعه مستقر عكس الزمالك اللي بيواجه مشاكل في التجديدات والمستحقات، لكن اللاعبين بيقدموا كل حاجة من أجل الشعار.
أشار بيسيرو إلى إن الأهلي وبيراميدز قادرين على الفوز بالدوري، لكن الأهلي الأقرب لأنه بيفوز بهوايته، وبفضل استقراره المالي والإداري. وقال إن في 4 لاعبين في الزمالك قادرين على الاحتراف في أوروبا، لكنه مش هيذكر أسمائهم.
وعن نهاية علاقته بالزمالك، قال بيسيرو: “أنا كنت سعيد مع الفريق، وأثق فيهم جدًا، والزمالك عنده روح ممكن تكسبه البطولات الجاية”. وأكد إنه ما كتبش أي تقرير فني زي ما البعض بيقول، وإن كل الكلام عن كده كذب.
قال بيسيرو إنه كان يتمنى يواجه الأهلي وهو مدرب الزمالك، لكن الأهلي انسحب. وأكد إن الأهلي قادر يقدم أداء كويس في كأس العالم للأندية ويوصل لنصف النهائي، وكمان يقدر يكسب بورتو.
عن الدوري المصري، قال بيسيرو إنه محتاج تنظيم وفرص عادلة لكل الفرق، وإن احتراف اللاعبين المصريين هيفرق في تطويرهم. وأشاد بتجربة رونالدو في السعودية، وقال إنها رفعت من قيمة الدوري هناك، وإن المصريين محتاجين يتعلموا من صلاح ومرموش.
أضاف بيسيرو إن زيزو إضافة لأي فريق، سواء داخل أو خارج مصر، وإنه لاعب محترف جدًا، وبيقدم أداء عالي في كل الماتشات. وبالنسبة للمثلوثي، قال إنه لا يفضل التجديد ليه، وبيشوف إن الأفضل للزمالك يكون فيه مزيج بين الشباب والخبرة.
نفى بيسيرو وجود أي مشكلة بينه وبين ناصر ماهر أو الجزيري، وأكد إنهم كانوا بيتواصلوا معاه بعد الرحيل بشكل إيجابي، وإنه كان بيتعامل مع كل اللاعبين كأسرة واحدة.
أخيرًا، قال بيسيرو إن زيزو هو أفضل لاعب في مصر بالنسبة له، وإنه لو كان استمر مع الزمالك كان هيطلب برحيل بعض اللاعبين واستمرار البعض، وكان هيكمل المسيرة للفوز بالبطولات في الموسم الجاي.
