ملخص لنصف ساعه من تصريحات ميدو النارية عن الرابطة والأهلي والصفقات وأزمة السعيد والرمادي ورسائل قوية – فيديو
قال أحمد حسام ميدو عبر قناة الزمالك إن عبد الله السعيد من أكتر اللاعبين المحترفين اللي شافهم في حياته، وبيتحمل مسؤولياته بشكل مثالي، وده بيخليه نموذج حقيقي لأي لاعب صغير.
وأوضح إن عبد الله السعيد كان منزعج بسبب كلام مالوش أي أساس من الصحة عن مستقبله، لكنه أثبت التزامه وشارك في مباراة النهاردة رغم إنه كان بيعاني من إصابة في ظهره.
أضاف إن الزمالك دخل بالفعل في مفاوضات مع عبد الله السعيد، وتم تقديم عرض رسمي، والنية موجودة من الطرفين إنه يكمل، لكن مفيش حاجة مؤكدة إلا بعد التوقيع.
أكد ميدو إن كل مسؤولي الزمالك عاوزين استمرار عبد الله السعيد، واللاعب كمان عنده نفس الرغبة، لكن من خلال خبرته في الكورة، مفيش حاجة مضمونة غير لما اللاعب يوقع فعلاً.
وأشار إلى إن الزمالك حالياً بيمر بمرحلة تاريخية، أهم ما فيها إعادة هيكلة قطاع كرة القدم بالكامل بشكل احترافي ومؤسسي.
قال إن لجنة التخطيط ومجلس الإدارة شغالين في اتجاه واحد، وإنه لأول مرة هيكون في ميزانية منفصلة تمامًا لقطاع الكرة، وهتكون واضحة وثابتة من بداية الموسم.
كشف ميدو عن اجتماع استمر 5 ساعات، جمعه بحازم إمام، عمرو الجنايني، هشام نصر، وأحمد فؤاد الوطن، وكان الغرض منه إنهاء تفاصيل الهيكلة الجديدة.
أوضح إن الزمالك هيعين مدير رياضي، مدير تعاقدات، ومدير مالي لقطاع الكرة، وكل موظف في القطاع هياخد راتبه بانتظام أول كل شهر.
أضاف إن أول بند في خطة التطوير هو البنية التحتية: هيتعمل ملعبين تدريب، وصالة ألعاب، وكاميرات لتصوير كل حاجة، وخبير تغذية، ومطورين أداء، وأجهزة تحليل حديثة.
قال إن الزمالك هيعمل ملفات كاملة لكل لاعب من البراعم لحد الفريق الأول، وهيتم التعاقد مع مدير تعاقدات يتابع العقود ويقيم أداء اللاعبين باستمرار.
أكد ميدو إن في شغل كتير مش ظاهر دلوقتي، لكن الجماهير هتحس بيه قريب، واللجنة الفنية ومجلس الإدارة متفقين على كل التفاصيل.
قال إن التغيير بيواجه مقاومة، لكنهم مكملين لأن ده طريق النجاح، وكلهم أبناء النادي وهدفهم يخلوه قوي من جديد.
وعن انسحاب الأهلي، قال ميدو إن التخبط واضح في نظام الكرة في مصر، مفيش لوائح واضحة، والقرارات بتتأخر وتتطبق على ناس وناس.
أضاف إن الرابطة دورها الأساسي مش بس تنظيم الدوري، لكن كمان تطوير عوائده، وده ما حصلش، والرابطة مش بتقوم بدورها زي باقي روابط العالم.
أكد إن المسؤولين في الرابطة مش فاهمين شغلهم، وبيسيبوا القرارات تتأخر لصالح أندية معينة، وده بيظلم أندية زي الزمالك وبيراميدز.
شدد ميدو على إن الزمالك شغال باحترافية في ملف خصم النقاط، ومعاه مستشارين قانونيين، ومش لازم كل حاجة تتقال في الإعلام، لكن النادي بياخد خطوات قوية.
قال إن لو الزمالك ليه حق، فهياخده حتى لو من المحكمة الدولية، وإن العدالة هتتحقق مهما كانت الضغوط.
وجه ميدو انتقادات حادة للمسؤولين الحاليين، وقال إنهم مش زي زمان، زمان كان في سمير زاهر وحربي الدهشوري، ناس بتعرف تدير الأزمات.
ختم ميدو كلامه برسالة واضحة: “الزمالك مش هيسيب حقه، ومهما حاولوا يظلمونا، هنرجع حقوقنا بالقانون وبالاحترافية”.
