فجّر أحمد حسام ميدو مفاجآت نارية عن كواليس عرض الأهلي لضم شيكابالا، مؤكدًا إن جوزيه كان “بيموت فيه” والفلوس كانت مفتوحة علشان يضمه، لكن قرار شيكابالا وقتها كان تاريخي.
وقال ميدو في بودكاست “ذا ميكر”: “الناس فاكرة إن شيكابالا كان رايح الأهلي وهيمضي، وأنا عارف الحقيقة.. الأهلي كان بيشد جدًا، ومعاه فريق وقتها يعتبر من أقوى الفرق، لكن اللي عمله شيكابالا يتحسب له، لأنه فضّل الزمالك رغم إن الزمالك ساعتها كان بيتجاهله تمامًا”.
ورد شيكابالا بنفس البودكاست، وقال: “أنا بحب الزمالك من غير ما أتكلم، بس لما رجعت من اليونان، الأهلي والزمالك بس هما اللي يقدروا يدفعوا الغرامات. الزمالك خمس مرات يبعتولي ومحدش يقابلني، كنت أوصل النادي ومحدش يرد عليا، لكن الأهلي كل يوم بيكلموني”.
وأضاف: “أنا وصلت مرحلة كنت هبطل كورة حرفيًا، رحت تمرنت في ملعب الأهلي وكان معايا تيشرت أبيض في الشنطة، بس أنا مش مرتاح.. لما كنت مع عدلي القيعي قلتله، لو الزمالك جاب جول واحتفلت.. أنا هبطل كورة. قالي لأ هتحب الأهلي، بس أنا مكنتش قادر”.
واختتم: “اللي غير كل ده إن ممدوح عباس كلمني وقالي تحب تعمل إيه؟ قلتله عايز ألعب في الزمالك.. قالي خلاص تعالى، وفعلاً روحت الزمالك ورفضت الأهلي.. وده قرار عمري ما ندمته عليه”.
