قال محمود عبد الرازق شيكابالا، قائد نادي الزمالك، إن الفريق بيتعرض لحرب مستمرة من أطراف كتير، ومع ذلك بيحقق بطولات رغم قلة الإمكانيات، وده بيحصل فقط بفضل الجمهور وشعار النادي.
قال شيكا في بودكاست “ذا ميكر” مع ميدو: “كأننا بنروح نلعب في الدوري الإنجليزي.. هما معاهم كل حاجة وإحنا رايحين باللوجو والجمهور بس”.
وأضاف: “الناحية التانية كل الناس بتساعدهم، وده مش طبيعي، لو عايزين فريق واحد بس اللي يكسب قولولنا نقفل النادي ونلعب خماسي”.
وأكد إن الزمالك يستحق دعم من الدولة علشان يكون في منافسة حقيقية في الكرة المصرية، وقال: “وجود الزمالك قوي بيخدم الكرة في مصر كلها”.
وعن بيراميدز، قال: “أنا مبسوط إنهم في نهائي أفريقيا، لأنهم اتعبوا واتحاربوا ومعاهم فرقة جامدة.. ليه منخليش كل الفرق جامدة؟ الأهلي، بيراميدز، الزمالك، والإسماعيلي كمان.. مش الناس زعلانة على وضع الإسماعيلي؟”.
