وائل جمعة يكشف فضيحه: الأهلي خطفني من الزمالك بعد ما وقعت والخطيب قالي اقفل تليفونك – فيديو

كشف وائل جمعة، نجم الأهلي ومنتخب مصر السابق، عن كواليس مثيرة لأول مرة، تخص انتقاله للنادي الأهلي رغم توقيعه مسبقاً لنادي الزمالك، مؤكداً أن القصة كانت مليئة بالأحداث والضغوط.

وقال وائل جمعة خلال ظهوره عبر قناة “بي إن سبورتس”:”كنت بلعب مع غزل المحلة، وفي مباراة ودية ضد الأهلي، قدمت واحدة من أعظم مبارياتي. كان بيتفرج وقتها مانويل جوزيه، اللي كان مرشح لتدريب الأهلي، وقال بعد المباراة إن أكتر اتنين عجبوه هم رقم 5 في الأهلي ورقم 5 في المحلة، اللي هما سمير كمونة وأنا”.

وأضاف جمعة:”سمير كمونة حصل له موقف بعد المباراة، الكاميرا جابت له لقطة وهو بيعمل إشارة خارجة لجمهور المحلة، فاتوقف سنة بسببها. الأهلي وقتها قال لجوزيه: سمير هيتوقف، قالهم: طب هاتولي رقم 5 بتاع المحلة”.

وتابع وائل جمعة:”بعد مباراة الدوري بين الأهلي والمحلة سنة 2001، الكابتن حلمي طولان بعتلي عربية، وطلعت على بيته الساعة 2 ونص بالليل. قعدت معاه علشان أمضي للزمالك، لكن مكنش معاه عقد رسمي، فاتصل بالمستشار مرتضى منصور، اللي كان وقتها نائب رئيس النادي، وقاله ابعت عقد علشان نخلص”.

وأوضح:”مرتضى قاله هات ورقة بيضا اكتب فيها أنك ممثل للنادي واللاعب وافق، وفعلاً كتبت ورقة اتفاق ووقعت عليها، ورجعت بيتي”.

ثم واصل:”وأنا نازل من بيت حلمي طولان، لقيت محمد عبدالوهاب وعدلي القيعي مستنيينني، اتكلموا معايا عن الأهلي، فقلت لهم للامانة أنا مضيت للزمالك وروني الورقة، كانوا مش مصدقين، بعتوا الورقة للمستشار القانوني للأهلي أسامة قنديل، وكان موجود كمان الكابتن محمود الخطيب”.

واستكمل جمعة روايته المثيرة:”كابتن الخطيب كلمني وقاللي: احنا شوفنا الورقة، واقفل تليفونك فورًا، متردش على أي حد، واحنا هنعرف نوصلك متقلقش. فعلاً قعدت كام يوم مستخبي، الدنيا كلها كانت بتدور عليا”.

وأكمل:”رجعت بعد كده علشان كان عندي معسكر منتخب مصر العسكري، والأهلي بعت عربية خدتني على مكتب محمد عبدالوهاب، كان موجود فيه المستشار القانوني، وقعت على عقد الأهلي، وبعدها العربية ودتني لمعسكر المنتخب”.

وتحدث جمعة عن رد فعل الزمالك وقتها:”الموضوع اتسرب، والمستشار مرتضى منصور عرف، ومكنش قادر يوصلي، فاتصل على لعيبة الزمالك اللي معايا في المنتخب زي عبدالحميد بسيوني وعبدالحليم علي، وفضل يزن عليهم علشان أتكلم معاه”.

وأضاف:”اللعيبة جابت التليفون في الأوضة، كان بيزعق ويشتم: أنا هعمل فيك وأنا هوديك ورا الشمس وابقى خلي الأهلي ينفعك. أنا سمعت كل حاجة ومردتش. قلت لزمايلي مش هرد عليه، الأهلي قاللي متردش ودي كلمتي”.

وختم القصة قائلاً:”بعد ما رجعت من معسكر المنتخب، وانتقلت للنادي الأهلي رسميًا، الدنيا هديت. بعد شهرين أو تلاتة، قابلت المستشار مرتضى منصور في فرح، سلّم عليا والمشكلة خلصت، مكنش فيه حاجة قانونية عليا”.

واختتم:”أنا أهلاوي، والبيت كله أهلاوية، بس في النهاية أنا لاعب محترف. لو الأهلي مجاشلي كنت هروح الزمالك عادي، لأنه نادي كبير جداً وثاني أكبر نادي في مصر وإفريقيا بعد الأهلي”.

شاهد :