أكد هاني رمزي نجم الأهلي السابق، أن الزمالك فاز بلقب مهم هو كأس مصر، لكنه بحاجة ماسة لإعادة بناء الفريق خلال الموسم القادم، مشددًا على أن بيراميدز كان الأفضل فنيًا خلال المباراة النهائية.
وقال رمزي في تصريحاته عبر برنامج بلس 90 على قناة النهار:
“الزمالك محتاج يعيد بناء الفريق من البداية، بيراميدز عنده سكواد أقوى، ويمكن التغييرات اللي عملها يورشيتش ساعدت الزمالك يرجع للمباراة، بس لو بنتكلم فنيًا، الفريق الأبيض محتاج 5 لاعبين سوبر على الأقل كبداية”.
وأضاف:
“مش منطقي نتوقع ضم 10 لاعبين، لكن لازم تكون البداية بكواليتي عالي جدًا، وبناء الفريق يتم على مراحل، وده مش هيحصل غير باستقرار إداري واضح واستراتيجية للميركاتو الصيفي”.
وتابع:
“في دول تانية بتفرض إشراك اللاعبين الشباب بدقائق محددة، وده لازم نبدأ نفكر فيه، إحنا عندنا أزمة في تأسيس اللاعبين الصغار، ومفيش عناصر سنها صغير بتظهر بقوة”.
وأوضح:
“خطة الموسم الجديد لازم تتحدد من دلوقتي، مع وضع ميزانية واقعية، وكمان حسم ملف المدير الفني مبكرًا، ممكن الإدارة تعمل جلسة معاه وتحدد الصفقات المطلوبة وفقًا لمعايير فنية واضحة”.
وأشار رمزي إلى أن الزمالك يحتاج تدعيم في مراكز حساسة، وقال:
“الدفاع، والظهير الأيمن، وخط الوسط، والهجوم، كلهم محتاجين شغل، والعمر لازم يكون عامل أساسي في اختيار العناصر الجديدة”.
واختتم:
“المنافسة صعبة جدًا، الأهلي الأقوى محليًا وإفريقيًا، وبيراميدز أصبح منافس حقيقي، والزمالك لازم يجهز نفسه من دلوقتي، ونحتاج كواليتي أعلى في الدوري المصري”.
