أكد مصطفى يونس، نجم الأهلي السابق، إنه مبقاش يروح النادي الأهلي خالص بقاله سنين، وقال: “أنا مابدخلش النادي بقالي حوالي 8 سنين، النادي مبقاش بتاعنا.. ناس تانية هي اللي قاعدة دلوقتي فيه، مش الناس بتاعتنا”.
وأضاف عبر إذاعة “أون سبورت إف إم”: “أنا مش لوحدي، أنا وجيل كامل مبندخلش النادي، لأننا مش عايزين نحتك بحد.. أنا عصبي جدًا، وممكن أعمل مشكلة، مع إن النادي ده بيتي وخيره عليا وعلى أولادي”.
وتابع: “أنا عايش على حس النادي الأهلي، بس أنا ليا دماغ تانية ومبعرفش أسكت على الغلط، ولا عمري نافقت حد”.
وكشف يونس إنه ماوصلتلهوش أي دعوة لحضور حفل افتتاح استاد الأهلي، وقال: “اتفاجئت إن الحفلة اتذاعت في التلفزيون.. وكنت مبسوط لأن دي كانت أمنية حياتنا، يكون عندنا استاد”.
واختتم كلامه برسالة واضحة، قائلًا: “اللي حصل معايا هو اللي حصل مع عصام الحضري، ده أعظم حارس في تاريخ مصر، ومجلس الإدارة موجود وماسلموش عليه! ده السلام لله يا أخي.. محدش يقدر يمسح تاريخنا”.
