أكد محمد هاني، لاعب الأهلي، أن مواجهات القمة بين الزمالك والأهلي دائماً بلا حسابات ولا يمكن التنبؤ بنتيجتها مهما كان وضع الفريقين قبل اللقاء.
وقال هاني في تصريحات عبر قناة “أون سبورت” مع الإعلامي إبراهيم عبدالجواد: “ماتش الزمالك والأهلي دايماً ملوش حسابات.. الماتشات الكبيرة كلها كده مفيهاش توقعات واضحة”.
وأضاف: “الناس كلها كانت شايفة إن بيراميدز هيكسب الكأس بسهولة بعد ما خد بطولة إفريقيا، والزمالك كان مستواه مش أحسن حاجة الموسم ده، لكن في الآخر الزمالك كسب.. علشان كده محدش يقدر يتوقع إيه اللي هيحصل في السوبر المصري، لأنه ماتش مختلف تماماً”.
وأوضح: “كنت متوقع إن الزمالك يكسب الكأس، وقلتلك كده قبل المباراة”، مشيراً إلى أن “الكرة في مصر ليها طعم تاني بوجود الأهلي والزمالك، رغم إن بيراميدز عمل إنجاز كبير جداً السنة دي بفوزه بدوري أبطال إفريقيا وده شيء مشرف للكرة المصرية”.
واختتم هاني تصريحاته قائلاً: “من الجيد وجود أندية زي بيراميدز بتنافس، وإن شاء الله في أندية تانية تدخل المنافسة.. لكن الأهلي والزمالك ليهم وضع تاني مختلف، والزمالك المفروض يكون في مكانة أحسن من كده بكتير”.
