قال سيد عبد الحفيظ، مدير الكرة السابق بالنادي الأهلي، إن بيراميدز أصبح التهديد الأكبر للزمالك في الوقت الحالي، مؤكدًا أن الفريق السماوي نجح في إزاحة الزمالك عن المركز الثاني خلال السنوات الثلاث الأخيرة، وهو ما لم يكن يحدث في الماضي.
وقال عبد الحفيظ في تصريحات عبر برنامج “اللعيب” على قناة “MBC مصر”: “أخطر حاجة على الزمالك حاليًا هو بيراميدز، اللي بقى فيه ناس بتشجعه دلوقتي. الزمالك عمره ما فرّط في المركز الثاني لمدة 3 سنين، لكن في آخر 3 مواسم بيراميدز هو اللي احتل المركز الثاني.”
وتابع: “أنا بتكلم عن خطورة حقيقية جاية، ولو الناس في الزمالك ما حسوش بيها دلوقتي، هتبقى مشكلة كبيرة. بيراميدز نجح يحقق معادلة صعبة فنيًا وإداريًا، وبدأ ياخد خطوات ثابتة. لما تبقى فارق عن نادي كبير بحجم وقيمة وشعبية الزمالك بهذا الكم من النقاط، فدي كارثة.”
وأضاف: “الزمالك ممكن يجيب لاعيبة ويدعم في الموسم اللي جاي، لكن بيراميدز حط أساس كبير يقدر يبني عليه.”
وواصل: “علاقة الزمالك وبيراميدز كويسة، وده مش مزعج للأهلي في حاجة. بيراميدز مش خطر على الأهلي، لكنه منافس قوي جدًا، وده لازم نعترف بيه، بس هو ما طلعناش من إفريقيا.”
واختتم عبد الحفيظ: “بيراميدز مؤثر فنيًا على الأهلي، وبيخلي الأهلي دايمًا مركز وحاطط عينه في وسط راسه.”
