علق الإعلامي الأحمر أحمد شوبير، على مباراة الأهلي أمام إنتر ميامي في كأس العالم للأندية، معبرًا عن حزنه الكبير لفرصة الفوز الضائعة بسبب بعض القرارات والتغييرات الغريبة في الشوط الثاني.
وقال شوبير في تصريحات عبر برنامجه الإذاعي صباح اليوم الأحد: “لو قلت ليا إيه أكتر مباراة زعلت عليها في حياتك هقولك مباراة الأهلي وإنتر ميامي .. لانه بجد يعني فعلًا الفوز كان بيناديك .. خصوصًا الشوط الأول عشان أكون منصف يعني”.
وتابع: “ريبيرو مدرب الأهلي الحقيقة عمل تغيير عجيب جدًا في الشوط الثاني.. راح مطلع زيزو في الدقيقة 80 ونزل حسين الشحات، تغيير غريب جدًا يعني”.
وأضاف: “خصوصًا إن زيزو كان لسه نازل و أنا طبعًا موافق إنه زيزو مش مكتمل اللياقة البدنية .. لكنه هو اللي عمل ضربة الجزاء للأهلي”.
وأردف: “وللأمانة الشديدة اللي كان مفروض يشوط ضربة الجزاء .. رقم 1 وسام أبو علي ورقم 2 زيزو ورقم 3 تريزيجيه”.
واستكمل: “تريزيجيه صمم إن هو اللي يخش يشوط حتى وسام كان مزرجن شوية في الملعب وده كان واضح وإحنا قاعدين في المدرجات شايفين”.
واستمر: “فالتغييرات معجبتنيش أوي يعني .. حسين الشحات في آخر كورة في الماتش مرتدة وكل فرقة إنتر ميامي قدام وحسين الشحات رايح على المرمى وعلى شماله اتنين لاعيبة أو تلاتة لاعيبة ويلعبها لواحدة بقى منفرد هو والمرمى”.
واختتم: “الشحات لا شاط ولا باصى ولا عرّض حتى ولا عمل حاجة خالص وراح متكعبل في الكورة وراح واقع وطاهر معرفش يدخل في الجيم وجراديشار معرفش يدخل في الجيم .. فأحيانًا التغيير بيبقى ملوش لازمة”.
