طارق يحيى ينفجر على الهواء: “حاسس بقهر.. اتحاسبت على مشاريب غيري واتشلت من الزمالك بدون سبب”!
في ظهوره الاعلامي، أطلق كابتن طارق يحيى نجم الزمالك الأسبق، صرخة مؤثرة خلال حواره مع الإعلامي إبراهيم عبد الجواد، كشف فيها عن كواليس استبعاده من قناة الزمالك ومن النادي دون أي توضيح، مؤكدًا أنه يشعر بالقهر والظلم الشديدين.
طارق قال بصراحة: “أنا اللي جوايا كتير جدًا ومش قادر أطلعه، حاسس إن ربنا سترها معايا الفترة اللي فاتت، أنا اتظلمت نفسيًا واتحاسبت على مشاريب غيري، وأنا ما ليش ذنب في حاجة.. كنت بشتغل في قناة فئوية، مش عامة، فمقدرش أرد ولا أوضح زي ما الناس فاهمة”.
وتابع بأسى: “الناس قرأت المشهد غلط، وحد وصل كلام غلط، وفجأة لقيت نفسي موقوف من القناة وموقوف من نادي الزمالك بدون حتى ما أُسأل أو أتحاسب”.
ورداً على سؤال عن علاقته بمجلس الإدارة، أكد يحيى أنه لم تحدث أي جلسة أو نقاش رسمي معه منذ وصول المجلس الجديد: “يوم 13 المجلس دخل، يوم 15 اتبلغت إني برّه القناة وبرّه النادي.. طب ليه؟ ما حدش قال لي ليه، أنا اسمي مش بسيط في تاريخ الزمالك، وعمري ما اتأخرت على النادي لا في فرح ولا في عزاء”.
وتوقف طارق يحيى عند مرحلة مهمة في مسيرته داخل الزمالك، مشيرًا إلى أنه كان رئيس قطاعات الكرة خلال صعود جيل كامل من اللاعبين أبرزهم: حسام عبد المجيد، يوسف أسامة نبيه، أسامة فيصل، سيف فاروق جعفر، وحسين فيصل، مؤكدًا: “الجيل ده صعد على إيدي مع كارتيرون وخدنا الدوري”.
عن مشاعره تجاه ما حدث، قال: “أنا مش شايل، لكن أنا حزين جدًا ومقهور، دي تاني مرة يتكرر نفس الموقف معايا، مرة أيام اللجنة، ومرة مع مجلس الكابتن حسين لبيب، أنا مش مع حد ضد حد، أنا زملكاوي وابن زملكاوي، عمري ما نسيت دعم جمهور الزمالك ليا في كل المواقف”.
وأضاف: “عندي ذكريات عظيمة من أول يوم دخلت فيه نادي الزمالك، كابتن حسن حلمي قال لأبويا (انقل أبوّتك من طارق ليا)، وكابتن حمادة إمام كان أب روحي ليا”.
واختتم تصريحه بتمنياته للزمالك بالتوفيق، مؤكدًا: “أنا ما عنديش أي غضب، أهم حاجة عندي نادي الزمالك، ولما بتكلم بتكلم لصالحه وبس”.
