أثار موقف المغربي أشرف بن شرقي خلال مباراة الأهلي وإنتر ميامي في افتتاح مشوار الفريق بكأس العالم للأندية، تساؤلات عديدة حول علاقته بالمدير الفني خوسيه ريبيرو، بعدما ظل اللاعب على مقاعد البدلاء دون أن يشارك أو يجري عمليات الإحماء، وهو ما دفع عددًا من نجوم الكرة المصرية السابقين للتعليق على الأمر، وكشف كواليس جديدة من شخصية المدرب وطريقة إدارته للمباريات.
وقال عمرو جمال في تصريحات عبر برنامج “اللعيب”، على قناة “mbc masr”: “هو الراجل ريبيرو ده كده.. وانا كنت بقول لحد اكيد أشرف بن شرقي كان زعلان انه مش بادئ والمدرب لو لاحظ كده مش هيلعبه ولا دقيقه.. دي شخصيته وانا ادربت معاه وعارف”.
ليعلق محسن صالح: “لا دي تفصيلة خطيرة جدا جدا وارجو تدخل سريع من كابتن محمود الخطيب رئيس الأهلي شخصيا لعلاجها، في نقطة في غايه الاهميه أن حاليا في كثرة نجوم في الأهلي فقبل ما تتكلم وتهيئ اللي هيلعب لأ… ده انت لازم تكون مهيئ نفسيا اللي هيقعد دكة وتفهمه، ودي مش محتاجه مدرب بس دي تحتاج تدخل الجهاز الإداري ومدير الكرة والمشرف على الكرة”.
وشدد محسن صالح: “لازم يحصل اجتماع وفي اللعيبه واحد واحد ويتقال ليهم كده وان مفيش في عقدك حاجه اسمها انك جاي تلعب أساسي بس ويبقى في عقوبات كبيرة في اللائحة لأي لاعب لا يلتزم”.
واختتم: “القصه دي أنا لاحظتها بنهاية الموسم لان جيه أشرف بن شرقي عمل كده .. وامام عاشور وهو طالع ماسك راسه وعمل كده”.
