رد أحمد حسام ميدو على موجة الغضب الجماهيري من جمهور الأهلي بعد تصريحاته الأخيرة، مؤكدًا أن كلامه تم اقتطاعه وتحريفه عن سياقه الحقيقي بهدف إثارة الجدل وتوجيه الاتهامات له دون وجه حق.
وقال ميدو في ظهوره عبر قناة “أون تايم سبورتس” مع الإعلامي إبراهيم عبدالجواد: “أنا عندي أصحاب أهلاوية كتير وبحبهم وبحترم النادي الأهلي جدًا، وكل الناس عارفة ده، واللي اتقال اتقص بقصد علشان يظهر إني بقلل من لاعيبة الأهلي وده محصلش”.
وأضاف: “أنا راجعت الفيديو بنفسي، ولقيت إني قلت إن في ماتش بالميراس كنت زعلان لأن لاعيبة الأهلي مكانوش بيعملوا أساسيات الكورة بشكل صح، وده كلام عام مفيهوش مكايدة، وقلت صراحة إن ده مش وقت مناكفات بين الزمالك والأهلي”.
وتابع: “كلامي كان فني 100%، واتكلمت عن فكرة إن الاستحواذ مش دايمًا معناها إنك الأفضل، لأن مدرب بالميراس كان أذكى ونجح في استنفاذ طاقة لاعيبة الأهلي في الشوط الأول، وده نتيجة إن مدرب الأهلي وقتها خبراته كانت قليلة وما كانش عنده حل بالكورة”.
وأشار ميدو إلى أن الهدف من تصريحاته كان التقييم الفني، وأضاف: “أنا بقالي 20 سنة في الإعلام، عارف كويس قوي أنا بقول إيه، وعمري ما بسيء لحد، واشتغلت في الـ ART وأنا عندي 22 سنة بلعب في توتنهام”.
واختتم قائلًا: “اللي حصل إن كلامي اتقص واتحول لهجوم على لاعيبة الأهلي، وده مش حقيقي.. أنا بشتغل علشان أقول رأيي باحترام، مش علشان أجامل أو أسيء”.
