فاجأت الإعلامية ياسمين عز جمهورها بتصريحات قوية دافعت فيها عن النادي الأهلي، بعد خسارته أمام بالميراس البرازيلي في كأس العالم للأندية 2025.
وقالت ياسمين عز خلال ظهورها عبر قناة “MBC مصر”: “النهارده أنا يا جماعة هتكلم في الكورة وهحلل الماتش.. هتقولي يا ياسمين يلا على المطبخ وبطلي فتي.. مش هكسرلك كلمة، طبعا هروح المطبخ، بس بعد ما أحلل الماتش.. أرجوك”.
وأضافت: “في حاجه غريبة جدا بتحصل.. ليه الإنسان بيشمت في أخوه الإنسان؟ ليه تشمت في شقيقك وأخوك الأهلاوي؟ هو مش لكل جواد كبوة؟”.
وتابعت: “عادي الأهلي خسر من بالميراس في كأس العالم للأندية.. مش دورة رمضانية يا سادة! في ناس مش عارفة تصعد دوري أبطال إفريقيا.. ليه الشماتة؟”.
وواصلت: “إيه يعني نخسر مرة؟ إحنا واخدين 4 برونزيات وكأس نص العالم.. ليه مركزين مع الأهلي كده؟ الحق إمام عاشور بيقبض كام.. الحق بن شرقي جاي بكام.. الحق زيزو واخد كام.. هو انت داخل معاهم جمعية؟”.
واختتمت قائلة: “ليه الشماتة ويقولك بعد كل الملايين اللي اتصرفت دي هو ده مستواك؟ طب أنت مالك؟ دي فلوسنا وإحنا أحرار فيها.. هو أنت دافع حاجة من جيبك؟ أرجوك يا عزيزي خليك في حالك.. أنت مصعدتش لكأس العالم ولا عمرك هتصعد.. ملكش دعوة بالأهلي.. اتفرج على MBC2 ولا دراما.. إن شاء الله حتى تتفرج على MBC3.. إحنا هنشجع الأهلي سواء كسب أو خسر”.
