فجّر أحمد سليمان، عضو مجلس إدارة نادي الزمالك، مفاجآت مدوية بشأن انتقال أحمد سيد زيزو إلى الأهلي، مؤكدًا أن القصة لم تكن مجرد مفاوضات عادية، بل كانت نتيجة لتدخل مباشر من الإدارة الحمراء.
وقال سليمان في تصريحات عبر قناة MBC مصر:
“أنا قولت قبل كده لما كنت مسؤول عن ملف الكرة في الزمالك، جاتلي فرص أضم لاعيبة من الأهلي، لكن وقتها كنت شايف إن بعد زيارة الأهلي للزمالك لازم يبقى في هدنة، ومفيش حد يقرب من لاعيبة التاني”.
وأضاف: “الناس تقول زي ما هي عايزة، بس أنا بقولها بصراحة، لولا تدخل إدارة الأهلي وتقويتهم لزيزو، مكنشي هيقدر يمشي من الزمالك بالشكل ده، وكان زمانه مجدد بأقل من الرقم اللي خده”.
وتابع عضو المجلس الأبيض: “زيزو كان عنده عروض عربية كتير، لكن تدخل الأهلي هو اللي أنهى كل حاجة”.
من جانبه، رد سيد عبدالحفيظ، مدير الكرة السابق بالأهلي، خلال نفس الحلقة قائلًا: “طب ما لو جات للزمالك فرصة يضم حمدي فتحي أو ديانج، مش كان هايضمه؟”، مضيفًا: “رئيس الزمالك نفسه حسين لبيب قال قبل الانتخابات إنه لو عايز ياخد لاعب من الأهلي هاياخده”.
ورد سليمان: “كل التصريحات دي كانت قبل زيارة الأهلي للزمالك، وبعد الزيارة المفروض كل حاجة تتغير، وهي هدنة محترمة”.
وأضاف: “ما الأهلي خد إمام عاشور قبل عبدالله السعيد كمان، وبعدين قصة عبدالله كانت قديمة، قبل ما يبقى في نية حقيقية لتحسين العلاقة بين الناديين”.
وفي ختام الحوار، قال مهيب عبد الهادي: “أنتوا خدتوا عبدالله السعيد قبل كده”، ليرد سليمان بوضوح: “مافيش علاقة، ده كان قبل زيارة الأهلي، وبعدها لازم يبقى فيه احترام متبادل ومفيش لعب على لعيبة التاني”.
