أكد أحمد حسن، مقدم برنامج “الكابتن” على قناة DMC، إن حلقة الأمس مع الكابتن وائل القباني، مدير الكرة السابق بالزمالك، كانت من الحلقات المهمة جدًا، وإنها أثارت حالة من الجدل والانقسام في الآراء بين مؤيد ومعارض لتصريحاته.
وقال أحمد حسن: “ناس شافت إن الراجل قال اللي عنده علشان الناس تبدأ تاخد بالها وتفكر للمستقبل، وناس تانية شافت إن ده إفشاء أسرار ماكانش لازم تتقال في البرامج.. بس في الآخر دي كلها وجهات نظر”.
وأضاف: “إحنا استضفنا القباني لأنه نجم كبير ومدير كورة سابق في الزمالك، واتكلم بمنتهى الصراحة، ومكانش لا مع ولا ضد الإدارة الجديدة.. الراجل قال نشوف التجربة الجديدة هتنجح ولا لأ، وطرح بعض الحلول كمان”.
وشدد أحمد حسن على إن المشكلة الحقيقية اللي لازم الناس تبص عليها هي ظاهرة “اللجان الإلكترونية”، وقال: “أنا أعني هذا الكلام.. في ناس مدفوعة الأجر بتشتغل عشان تسكت أي حد بيتكلم، وده اسمه تكميم أفواه، وده بقى أسلوب سخيف جدًا”.
وأوضح إن القباني مكانش بيتجنى على أي حد، وقال: “الراجل مكانش بيغلط في حد، بالعكس كان صادق وقال إنه من أول يوم مع اللاعيبة مكنش بيضحك عليهم، ووضح كمان موضوع عبدالله السعيد، وأحمد حمدي، وقال إن النادي دفع له فلوسه واللاعب طلع اتكلم وهو مش عارف التفاصيل”.
واختتم أحمد حسن تصريحاته قائلاً: “اللي بيحصل إن أي حد يقول رأيه أو كلمة حق يتم الهجوم عليه، ويتقال عليه إنه ضد النادي، ودي بقت حاجة صعبة جدًا في الوسط الرياضي”.
