شن أحمد حسن، قائد منتخب مصر السابق، هجوم ناري على إدارات الأندية وطريقة تقديم اللاعبين الجديدة، مؤكدًا إن المشهد أصبح “مليان مكايدات وتلقيح” بين الفرق، وإن الشكل بقى سيئ جدًا في عيون الناس.
أحمد حسن قال في تصريحات نارية عبر قناة DMC:”هو مش كفاية بلالين؟ والله بجد، مش خلاص؟ شكلنا بقى ماسخ جدًا، وكل حاجة بقت مكايدة في التقديمات!”.
ورجع الصقر لتقديم إمام عاشور لما ظهر بـ”بلونة”، وقال: “انتقدناه قبل كده لما طلع بلونة وقالك بلعب بنتي.. وكان مشهد غير مقبول، والناس كلها هاجمته”.
وأضاف:”النهارده الزمالك بيقدم أحمد شريف ببلونة حمرا، حدفها كده وخلاص! يا جماعة الشكل بقى وحش، وبنشرقي قبل كده، وزيزو، ونفس الحكاية المدرب اللي بيحدف سهم على الأهلي الحمراء!”.
وتابع:”العيب مش على اللعيبة بس.. العيب كمان على الإدارات اللي بتوافق على الشكل ده! مكنش كده بيحصل زمان، مكنّاش بندور غير على الفنيات والتكتيك”.
وختم أحمد حسن تصريحاته: “بقينا بندور إزاي نكيد بعض، إزاي نلقّح على بعض، ونسينا الكورة نفسها! يا جماعة متلعبوش لعبة السوشيال ميديا، الأندية أكبر من كده ولازم تكون أرقى”.
