أحمد سالم يفتح النار على احمد شوبير على الهواء ويلقنه درس تاريخي بسبب قناة الأهلي – فيديو
شنّ أحمد سالم المتحدث الرسمي باسم نادي الزمالك، هجومًا عنيفًا على الإعلامي أحمد شوبير، بسبب تصريحاته الأخيرة التي تطرّق فيها لتفاوض الزمالك مع اللاعب أحمد عبد القادر، مشيرًا إلى أن هناك “زج متكرر باسم الزمالك” في كل أزمة تخص الأهلي.
وقال سالم عبر قناة الشمس: “كابتن شوبير بيتكلم كل يوم، وأنا دايمًا بقول إن اللي بيني وبينه كل خير، لكن فجأة لقيته بيهاجم الزمالك بخصوص أحمد عبد القادر، وبيقول ده مش احتراف. طب ليه دايمًا الزمالك في جملة مفيدة؟ هو القفلة اللي عاملها الزمالك مضايقاكم؟”.
وأضاف: “يا كابتن شوبير، حضرتك ليه سايب مشاكل الأهلي اللي كل يوم بتزيد، وداخل تحشر الزمالك في الموضوع؟! معتز إينو طلع قال إنه قبض فلوس من رئيس الأهلي وقت ما كان مرتبط بعقد، ومحدش اتكلم.. ليه ما علقتش؟! ليه سايب الكلام ده؟ يا ترفع قضية على إينو يا تقول حصل”.
وتابع سالم: “حضرتك داخل في خناقة مع محمد عمارة علشان قال إن في مشاكل في أوضة اللبس بالأهلي، وبتقول هتاخد إجراءات قانونية، طيب ما انت كل يوم بتتكلم عن لاعيبة الأهلي اللي عايزين يمشوا أو عايزين فلوس، ومحدش بيقولك حاجة! ليه لما أي حد يجيب سيرة الأهلي بنعتبره خائن؟ والزمالك سهل نهينه؟!”.
وأكمل: “كل حاجة لازم ييجي فيها سيرة الزمالك! حتى لما تتكلموا عن كأس العالم للأندية، ما تقولوش الأهلي خسر، لأ، تقولوا الزمالك مراحش! هو في إيه؟ الزمالك ملوش علاقة بالمشاكل اللي عندكوا، ولاعب عايز يمشي علشان يلعب أساسي، الزمالك ماله؟”.
واختتم سالم تصريحاته بنبرة حادة: “نفس الإعلاميين اللي بيهاجموا الزمالك لو نفس الموقف حصل في الأهلي يدافعوا باستماتة، يعني زيزو لما مشي وماراحش النادي، عادي! لكن وسام لو مشي من الأهلي تبقى خيانة؟! هو ده الإعلام اللي المفروض يكون محايد؟! للأسف ده الواقع”.
شاهد
