القيعي والمنيسي يفتحان النار على كريم حسن شحاتة: اتهامات غير أخلاقية.. والأهلي لا يمنع انتقال لاعبين للزمالك!
ردّ إبراهيم المنيسي، رئيس تحرير مجلة الأهلي، وعدلي القيعي، مدير التعاقدات السابق بالنادي الأهلي، على تصريحات الإعلامي كريم حسن شحاتة، والتي اتهم فيها محمود الخطيب رئيس الأحمر، بالتدخل لمنع انتقال اللاعب حامد حمدان إلى نادي الزمالك، وطلبه من إدارة بتروجيت تعطيل الصفقة.
وقال الإعلامي إبراهيم المنيسي عبر قناة الأهلي: “خرج علينا الكابتن كريم حسن شحاتة بحاجة غريبة جدًا .. حاجة غريبة يعني، لأنه اتهام غير أخلاقي بأن رئيس الأهلي كلم بتروجيت علشان حامد حمدان ميروحشي الزمالك”.
وعلق عدلي القيعي عبر قناة الأهلي: “ده من المفاجآت الصادمة ليا يا أستاذ إبراهيم في كريم طبعًا… لانه عكس خطه العام يعني، انت عمال تقول قالوا وبعدين تقول معلومة، هي معلومة ولا قالوا؟ وبتقول مش عارف ليه الأهلي عمل كده أنت مش عارف ليه؟ لأن محصلش .. الأهلي لو دخل على لاعب يبقى داخل عشان عايزه”.
وأضاف القيعي: “طب أنا أقول لك سؤال، هو مصطفى شلبي الأهلي لما راح له كانت رغبته يروح فين؟ الأهلي… ودخل الزمالك اتفق مع نادي إنبي وغيروا مسار اللاعب وخدوه، بعدين يقولك في صلة قرابة بين رئيس الناديين، رئيس شركة إنبي وبتروجيت، طب هو مين اللي قالك الكلام ده؟”.
وأردف: “حامد حمدان ده كان في ناشئي النادي الأهلي، طيب لو النادي الأهلي هنفترض إن هو وقتها مكنش يعني الحاجة ملحة إليه، لو الأهلي شايف إنه محتاجه دلوقتي هيخش يتفاوض عليه زي الزمالك ما بيتفاوض عليه”.
وأشار: “طب إيه اللي يجبر بتروجيت إنه يسمع كلام غريب؟ هو بتروجيت ده إدارة من إدارات الأهلي؟ يقول لك الكابتن خطيب كلم رئيس نادي بتروجيت عشان يمنع انتقاله للزمالك… يعني أنا لما رئيس نادي ويجي رئيس نادي تاني يقول لك أنا مش عايز اللعيب بس متوديهوش لنادي الزمالك، تسمع كلامي ليه؟”.
واختتم: “فكرة إزاي الكابتن كريم ابن حسن شحاته اللي كل مشواره إنه راجل بيحاول يكون موضوعي إلا قليلًا، بس مكنش بالطريقة دي … عمره ما وصل إلى هذه المرحلة من الضيق ويقولك أنا مش فاهم وإزاي .. وده كلام يقوله؟ دي كلام يخش عقل إنسان؟”.
