“اللوكشة موقفاه”.. صفقة محمد إسماعيل إلى الزمالك على المحك بسبب بند غريب! كريم حسن يكشف التفاصيل

كشف الإعلامي كريم حسن شحاتة، عبر قناة الحياة، أن صفقة انتقال محمد إسماعيل لاعب زد إلى نادي الزمالك كانت شبه محسومة، لكن تفصيلة مالية بسيطة مازالت تُعطل حسمها بشكل نهائي.

وقال كريم:
“لغاية امبارح كنت بقولكم إن محمد إسماعيل خلاص انتقل للزمالك، لكن اللي موقف الموضوع هو إن اللاعب عايز مقدم تعاقد، والنادي عنده نظام جديد منع ده.”

وأوضح أن نادي الزمالك أقر نظامًا جديدًا في العقود بقيادة مدير منظومة الكرة جون إدوارد، وهو ما يُغير قواعد الصرف التقليدية داخل الكرة المصرية، مضيفًا:
“النظام الجديد بيقول مفيش مقدم تعاقد.. اللاعب هياخد فلوسه على 12 شهر، يعني لو بياخد 10 مليون، يقبض كل شهر جزء.”

وأشار كريم إلى أن الزمالك انتهى من الاتفاق بالكامل مع نادي زد، لكن العقبة الوحيدة المتبقية هي رغبة اللاعب في الحصول على مقدم تعاقد، وهو ما يرفضه الزمالك تمامًا، حيث قال:
“معظم الأندية بتدي مقدمات، والزمالك قال لأ، مش هنمشي على النظام ده. عايز تلعب في الزمالك أهلاً وسهلاً، مش عايز انت حر.”

وأكد أن النظام المالي الجديد داخل الزمالك مستوحى من التجارب الأوروبية، ويهدف للحفاظ على تركيز اللاعبين، موضحًا:
“اللاعب في أوروبا بيقبض أسبوعيًا، والفكرة كلها إنك تبقى ملتزم عشان تاخد فلوسك، والزمالك ناوي يطبق ده بالكامل.”

واختتم كريم تصريحاته قائلًا:
“الوضع طبيعي.. أي لاعب رايح نادي كبير بيحب ياخد لوكشة في الأول، لكن الزمالك دلوقتي مش بيشتغل كده.. الصفقة ممكن تتفركش لو اللاعب مصمم.”