رد الكابتن وائل القباني مدير الكرة السابق بنادي الزمالك، على الحملة اللي بتتعرضله بعد تصريحاته الأخيرة، مؤكدًا إنه ما سربش أي أسرار من داخل النادي، وإنه كل اللي قاله كان بهدف توضيح الحقائق بعد نهاية مهمته.
وقال القباني في مداخلة مع برنامج “الكابتن” على قناة dmc: “أنا مش فاهم إيه سبب الحملة اللي عليا! أنا ما قلتش أسرار ولا أسأت لحد، كل اللي عملته إني وضحت بعض الأمور اللي الناس كانت فاهمة غلط”.
وأضاف: “أنا اتكلمت بعد ما خلص شغلي في النادي، مش وأنا فيه، وده فرق كبير، وما غلطتش في أي شخص، بالعكس أنا أشدت بـ أحمد سليمان وهشام نصر، وقلت إنهم ساعدونا نعدي مرحلة صعبة”.
وتابع: “لما أقول إن اتعاقب لاعبين عشان التليفون، أو إن النادي وفر 15 مليون، أو إن دونجا اتخصم له، هل ده يعتبر فضح للنادي؟ أنا بس وضحت الصورة للرأي العام، مش أكتر”.
وأشار القباني إلى إن الجمهور لازم يفرق بين اللي بيحصل أثناء العمل، واللي بيتقال بعد الرحيل، وقال: “أنا قلت إن الزمالك تكفل بسفر أحمد حمدي، وبعتله صورة الشيك، هل ده يضر النادي؟ بالعكس أنا بحافظ على حقه”.
واختتم تصريحاته: “أنا بحب النادي، ولسه في حاجات كتير ما قولتهاش علشان ما يحصلش مشاكل، والرجل اللي بيقول الحقيقة دايمًا بيتهاجم، وأنا لا طلبت أرجع ولا حاجة”.
