جمال عبدالحميد يشن هجوماً على إدارة الزمالك.. ماشية في طريق الفشل وقرار جون إدوارد بسبب الخوف

شن جمال عبدالحميد، نجم الزمالك ومنتخب مصر السابق، هجومًا ناريًا على سياسة جون إدوارد داخل نادي الزمالك، مؤكدًا أن تجاهل أبناء النادي ورفض الاستعانة بهم سببه “الخوف من التأثير على قيادته”.

وقال جمال عبدالحميد عبر قناة النهار في برنامج “بلس 90”: “الزمالك غني بأبنائه، ومدربي الزمالك منتشرين في الدوري المصري والدول العربية، وبيحققوا نجاحات كبيرة، ومفيش سبب واحد يخلي الإدارة تجيب ناس من بره إلا إن جون إدوارد مش عايز حد يزاحمه على القيادة”.

وأضاف: “جون إدوارد بعد ما أخد الصلاحيات من المجلس، بدأ يجيب مسؤولين من خارج النادي، علشان يقدر يقودهم بنفسه، لكن اللي بيعمله ده هو أول طريق الفشل”.

وتابع: “نادي الزمالك مليان نجوم لعبوا في كأس العالم وعندهم خبرات كبيرة، وقادرين يديروا كل ملفات الكرة بكفاءة، ومش طبيعي إنك تستبعدهم وتجيب حد من بره، إلا لو كنت خايف من تأثيرهم”.

واختتم كلامه قائلًا: “لا يجوز مطلقًا الاستعانة بحد من خارج الزمالك وإنت عندك أولاد النادي اللي فاهمين كل كبيرة وصغيرة فيه”