“رجّع حساباتك”.. سيف زاهر يوجه تحذيرًا شديدًا لوسام أبو علي على الهواء بشكل غريب – فيديو

وجّه الإعلامي سيف زاهر رسالة قوية إلى لاعب النادي الأهلي وسام أبو علي، بسبب ما وصفه بـ”التصرف غير المحسوب” الذي قام به اللاعب مؤخرًا على وسائل التواصل الاجتماعي، بعد بيان النادي الرسمي بشأن مستقبله مع الفريق.

وقال سيف زاهر عبر قناة أون تايم سبورت:
“أنا بحب وسام جدًا وبعتز بيه، لكن لازم أقول نقطة نظام.. البوست أو الإيموشن اللي نزله امبارح كان توقيته خاطئ تمامًا، ماينفعش تبقى بتلعب في الأهلي وينزل بيان رسمي، وترد بإشارة تفتح باب التأويل والتكهنات للجمهور والإعلام”.

وأكد زاهر أن التعامل مع جمهور الأهلي يحتاج حكمة:
“أوعى تاخد ريسك في حب الجمهور، جمهور الأهلي بيعشق الكيان، وأي إحساس إن مصلحتك غير مصلحة الفريق بيكون له تمن غالي”.

وكشف زاهر عن كواليس جلسة خاصة جمعت بين الكابتن محمد يوسف مدرب الفريق واللاعب وسام أبو علي، حيث قال يوسف للاعب:
“المشهد ده ميتكررش تاني.. النادي الأهلي نزل بيان رسمي، يبقى خلاص نلتزم، ومفيش كلام على السوشيال يفتح أبواب تساؤلات”.

وأضاف زاهر:
“محمد يوسف قال له كمان إنك بتلعب في واحد من أكبر أندية العالم، ولازم تعرف إن ليك قيمة كبيرة، أقل من 10 مليون دولار ما فيش تفكير في البيع، ودي سياسة الأهلي في التسويق”.

وتحدث سيف زاهر عن طريقة الأهلي في إدارة ملف بيع اللاعبين، قائلًا:
“الأهلي مدرسة، يعرف إمتى يرمي بيان، وإمتى يقول مش للبيع، علشان السعر يعلى، ولو النادي اللي بيشتري وصل للرقم اللي الأهلي عايزه، أهلاً وسهلاً، غير كده مفيش بيع ولا ضغوط هتنفع”.

واختتم زاهر رسالته قائلًا:
“أنا بقول الكلام ده لأن وسام لاعب بحبه، بس لازم يفهم إن الأهلي ليه طريقة معينة، ولازم يلعب جوا المنظومة مش ضدها.. عشان كده قلت له: غير الطريقة، لف وارجع تاني كما كنت”.