كشف سيد عبد الحفيظ، مدير الكرة السابق بالنادي الأهلي، عن كواليس أزمة اللاعب وسام أبو علي، مؤكدًا أن الأزمة لم تكن بسبب رغبته في الاحتراف، بل في الطريقة التي تعامل بها مع النادي، والتي اعتبرها مساسًا بهيبة الكيان.
وقال عبد الحفيظ في تصريحات عبر برنامج “اللعيب” على قناة MBC مصر: “من حق أي لاعب يفكر في الاحتراف، لكن المشكلة بتبدأ لما يأخذ من هيبة المكان، سواء كان وسام أبو علي أو أي لاعب آخر”. وأضاف: “الأصول بتقول إنك تفاوض ناديك وتتوصل لاتفاق يرضي الطرفين، مش إنك تعمد لليّ الذراع”.
وتابع: “كل لاعبي الأهلي من حقهم يحلموا بالاحتراف، ولو جالهم عرض مناسب بنساعدهم، لكن في اللحظة اللي تتجاوز فيها حدود النادي وتقلل من قيمته، الأمور بتتغير، وساعتها بيكون من الصعب الرجوع”.
وعن موقفه من اعتذار وسام أبو علي، قال عبد الحفيظ: “اللاعب كان عايز يعمل حاجة ما بتحصلش في الأهلي، وسافر من غير إذن، وده قرار يخصه، لكن كونه اعتذر ده مش كفاية. هو اعتذر فقط علشان يحسن صورته”.
وأجاب عبد الحفيظ عند سؤاله عن قبول الاعتذار: “أنا شخصيًا مش بقبل اعتذاره، وتجربتي مع لاعبي الكرة من سنة 1998 بتقول إن في نسبة كبيرة منهم بيظهر معدنهم وقت القرارات المصيرية، وهنا الفرق بين اللاعب المتربي صح وغيره”.
واختتم تصريحاته قائلًا: “الأيام دول، ممكن تكون صاحب قرار النهارده ومش بكرة، وده لازم كل لاعب يعرفه، لأن السلوك والانتماء الحقيقيين بيبانوا وقت المواقف الصعبة”.
