وجّه الإعلامي سيف زاهر رسالة نارية للاعبين المحترفين في الدوري المصري، مؤكدًا إن بعضهم بيتعامل مع الاحتراف بشكل غير مقبول تمامًا، وبيظلموا الأندية اللي وثقت فيهم.
قال زاهر عبر قناة أون سبورت: “اللعيب دلوقتي بيخش النادي يتصور ويقولك كان حلمي ألعب هنا، وبعد ما يوقّع أربع سنين وياخد فلوس كويسة ويبقى حبيب المسؤولين، أول ما ييجي له عرض من نادي أكبر يتأمر ويمتنع عن التدريب ويقولك مش لاعب كورة تاني! هو ده الاحتراف؟”
وأضاف: “يا جماعة ده مش دوري رمضاني، لما يجي لك عرض كبير، خليك محترف وسيب النادي يستفيد منك الأول، مش تمثل عليه وتقول مش جاي ومش لاعب”.
وأوضح إنه تلقى اتصالات من أكتر من رئيس نادي في الدوري الممتاز بيشتكوا إنهم مش قادرين يسيطروا على بعض اللاعبين، وقال: “مش هتسيطر عليه؟ بطل كورة، اقعده… فيه عقد وملتزمين بيه، ومفيش حاجة اسمها مش لاعب، الكلام ده مش موجود في أي حتة في العالم”.
واختتم رسالته: “خلي النادي يبيعك برقم كويس وخد رزقك، بس متخليش نفسك رخيص وتفكر إن دي الطريقة اللي تمشي بيها”.
