علّق الإعلامي سيف زاهر على الجدل المثار حول انتقالات اللاعبين بين الأندية الكبرى، مؤكدًا أن عصر المفاجآت والصدمات في الصفقات قد انتهى، وأن كل شيء أصبح واردًا، بما في ذلك انتقال اللاعبين بين الأهلي والزمالك بشكل مباشر.
وقال زاهر عبر برنامج “ملعب أون” على قناة أون سبورت: “الموضوع بقى واضح، ما عادش في صفقة هتخض، خلاص كل حاجة بقت واردة، واللي مش فاهم كده يبقى مش متابع الكورة الحديثة”.
وتابع: “جمهور الأهلي والزمالك لازم يفهم إن ده احتراف، اللاعب اللي بيجدد مع ناديه تمام، واللي بيدور على مصلحته ده حقه، وملعب الانتقالات بقى مفتوح، ولو سبت لاعبك فري أو قرب عقده يخلص، يبقى ما تلومش غير نفسك”.
وشدد زاهر على ضرورة فصل الانتماء عن الاحتراف، قائلًا: “سيبك بقى من الحتة بتاعة الولاء والانتماء، دي بقت نادرة، الحالات دي زي شيكابالا في الزمالك أو الشناوي في الأهلي، والباقي كله بيحسبها ماديات واحتراف”.
وأشار إلى أن بعض الأندية كانت تتحايل على الجمهور بصفقات عبر “الكوبري” أو “الطريق الدائري”، ولكن الآن الأمور أصبحت مكشوفة للجميع، واللعب أصبح على المكشوف، قائلًا: “لو عايز تبيع لاعبك بيعه بوضوح، ما تبعتوش يلف ويرجع من باب تاني”.
وأنهى زاهر حديثه برسالة قوية: “النادي اللي مش قادر يحافظ على نجومه ويأمن عقودهم بدري، يبقى عنده مشكلة، وكل نادي لازم يحضن على لاعيبته، لأن أي لاعب بقى من حقه يوقع في يناير، والقصة مش محتاجة شرح”.
