شوبير: فيديوهات صفقات الزمالك والأهلي تشعل الفتنة بين الجماهير.. ومفيش داعي للدوشة! فيديو
علّق الإعلامي أحمد شوبير على أسلوب الأندية في تقديم صفقاتها الجديدة، مؤكدًا أن الإبداع في تلك الفيديوهات أمر إيجابي وممتع للجماهير، لكنه شدد على ضرورة الابتعاد عن التلميحات التي قد تثير الجدل أو تغذي التعصب بين جماهير الفرق المختلفة.
وقال شوبير في تصريحات عبر برنامجه الإذاعي صباح اليوم الخميس: “تقديم الصفقات يا جماعة بتبقى فكرة جميلة حلوة ورائعة يعني والناس بتبقى مستنية الفيديو هنا والفيديو هنا والإبداع”.
وتابع: “كان الأهلي بيقدم صفقات وكانت بتحوز على رضا الناس وحب الناس الأهلاوية طبعًا وكانت الفتره الأخيرة بتقابل بكثير من الغضب من جماهير نادي الزمالك إن فيها تلميحات وفيها قصة هنا”.
وأضاف: “وبعدين بدأت بقى هي طبعًا من وقت تقديمه أشرف بن شرقي ولما ظهر والقصة والحكايه وقالوا إنه ده ليه علاقة بالزمالك”.
وأردف: “وبعدين الزمالك بيقدم المدرب ومش عارف بيصوب إيه ناحية إيه فبدأنا بقى الناحيه التانيه القصة وبقى في حاجات كده يعني دوشة بدأت تعمل مناوشات”.
واستكمل: “وإحنا أصلًا مش ناقصين يعني ما تخلينا في الطبيعي .. ماشي متع جمهورك واعمل حاجة لذيذة واعمل حاجة حلوة وقدم بشكل جيد”.
وأشار: “بس أنا بتكلم هنا على الطرفين على فكرة عشان م محدش يقولك وإنت ليه متكلمتش على بن شرقي وليه متكلمتش عن مين وهكذا ما إحنا دايمًا إحنا أشطر ناس في الجدال”.
وشدد: “تقديمه بن رمضان عجبتني جدًا يعني مستوحاة من التراث داخل تونس بشكل جميل وتقديمه عمرو ناصر عجبتني هادية وجميلة وكتاب بتصفحه وهدافين نادي الزمالك”.
واختتم: “فاتمنى الفترة اللي جاية إحنا يا جماعة من نفسنا كده نطلع مبادرات داخلية مبادرات ذاتية ومش لازم كل القصة إن إحنا يبقى فيها عملية شحن أعتقد إنها كتير كتير شوية إحنا محتاجين هدوء”.
