أكّد أيمن يونس، نجم الزمالك السابق، أن تعيين جون إدوارد في منصب المدير الرياضي للنادي يُعد مكسبًا كبيرًا، مشيرًا إلى أنه يمتلك شخصية ذكية ومناسبة جدًا لطبيعة العمل داخل الزمالك.
وقال يونس في تصريحات عبر برنامج “الكابتن” مع أحمد حسن على قناة DMC: “جون إدوارد مكسب حقيقي للزمالك، وده منصب حساس جدًا، لأنه حلقة وصل بين الإدارة واللاعبين، ولازم يكون الشخص المناسب فيه”.
وأضاف: “اللي صدمني فعلًا هو غياب أبناء النادي عن المنصب ده، رغم إن في أسماء كبيرة وتاريخية مسكت المنصب قبل كده، بس في الفترة الأخيرة ولاد النادي ما قدموش نفسهم بالشكل اللي يليق”.
وأشار يونس إلى أن الوسط الرياضي بقى فيه عدد كبير من المنتفعين اللي لا علاقة لهم بكرة القدم، وقال: “بقينا مش بنحب بعض، وفي ناس دخيلة على المجال شوهت صورة لاعبي الكرة، ولوثوا كل حاجة حوالينا”.
وانتقد يونس غياب الكوادر المؤهلة من أبناء الزمالك قائلاً: “فين الكوادر؟ ليه مفيش دورات إعداد وتأهيل؟ وفي ناس قاعدة على كراسي مش لايقة عليهم خالص”.
واختتم كلامه قائلاً: “أنا بحترم الكابتن عبد الناصر محمد طبعًا، هو راجل صاحب خبرة، بس اللي صدمني هو إن مفيش كادر كبير من أبناء النادي في المنصب ده.. وجون إدوارد فعلاً مكسب مهم جدًا”.
