شنّ الكابتن طارق يحيى هجومًا ناريًا على ما يحدث داخل نادي الزمالك حاليًا، مؤكدًا أن الأمور وصلت لمرحلة صادمة تفقد النادي هويته، وقال في تصريحات عبر قناة النهار: “أنا نفسي مسدودة، والله العظيم اللي بيحصل في نادي الزمالك قرف ومش طبيعي، أنا مصدوم ومذهول من اللي بيحصل”.
وتابع: “ناس كتير دخلت النادي ومحدش عارفهم، زي حسن جمعة وعبد الناصر محمد ورمزي وجون إدوارد. مع احترامي ليهم، بس هو نادي الزمالك نضب؟ فين ولاد النادي؟ القباني مشي، عبد الواحد مشي، إسماعيل يوسف مشي، والزمالك بيضيع”.
وأضاف طارق يحيى: “إحنا صابرين على كوارث كتير وبنسكت وبنساند النادي عشان إحنا أولاده، بس دلوقتي مفيش ولا واحد من ولاد الزمالك موجود. هوية الزمالك بتتباع يا جماعة، واللي يزعل يتفلق”.
وأكد: “أنا مش عايز أشتغل في النادي ولا عايز حاجة، بس أنا بتكلم كزملكاوي غيور، كل يوم حاجة بتحصل تخليك تتخض أكتر من اللي قبلها. هو مفيش حد زملكاوي ينفع؟! أحسن مدربين مصر زملكاوية، واشتغلوا في الخليج وبرا مصر”.
وختم كلامه غاضبًا: “اللي سمعته كمان إنهم هيغيروا عمال أوضة اللبس.. هو النادي كله هيتغير؟ هنجيب حتى أوضة لبس الأهلي؟! هوية الزمالك بتضيع، أقسم بالله”.
