تحدث طارق يحيى، نجم الزمالك السابق، عن تعيين جون إدوارد مديرًا رياضيًا للقلعة البيضاء، مؤكدًا دعمه الكامل له، لكنه شدد في الوقت نفسه على أهمية الحفاظ على هوية النادي والاستعانة بأبنائه.
وقال طارق يحيى في تصريحات عبر إذاعة “أون سبورت إف إم”: “أنا قلت كل الدعم لجون إدوارد في الزمالك وكلنا معاه وبنسانده، وقلت رأيي، لكن يا جون لما تيجي تشتغل لازم تستعين بأبناء النادي”.
وتابع: “جمال عبدالحميد كان ليه تعليق عقلاني جدًا في الحتة دي.. قال ما هو كمان ممكن يعين مثلًا عبدالحليم علي في المنصب ده، بس هو شايف إن عبدالحليم كاريزما ونجم، فهو مش عايز كده، لأنه ممكن مش هيعرف يسيطر عليه، ممكن هو عايز حد تحت إيده، أقل منه شهرة، أو عايز حد تبعه علشان يعرف يشتغل، وده حقه، ماعنديش مشكلة، لكن في قواعد يا جماعة”.
وأضاف: “يعني أنا عايز أقول مثلًا، ماذا لو حدث ما حدث؟ زي اللي حاصل دلوقتي، مشى كل الناس من أبناء الزمالك وجاب ناس بيثق فيهم هو، وكانوا شغالين في فاركو أو أيًا كان بقى قصدي معاه يعني.. طيب لو لقدر الله مش بتمنى كده، لو مشي في أي وقت، لقدر الله، كل التيم اللي معاه ده هيبقى وضعهم إيه؟”.
واستكمل: “مش بتكلم عن الجهاز الفني.. بتكلم على الجهاز الإداري، ومدير الكورة، والمساعدين، ومدير شؤون اللعيبة، وكل التغييرات دي.. هنجيب منين وقتها بقى؟ هنرجع لنقطة الصفر تاني يعني!”.
وشدد: “ثانيًا، هل لما أنا أمشي كل الناس اللي في الزمالك دي وأجيب ناس من بره، مش كده بهدم كوادر الزمالك يا جماعة؟ مش عايز أقول بصوا للنادي الأهلي بيعمل إيه”.
وأضاف: “بس انت عندك كابتن صالح سليم كان بيُوضب ويحضر لحسن حمدي من بعده، وحسن حمدي بيُوضب ويحضر للخطيب من بعده، وهكذا في مختلف المناصب”.
واختتم: “أنا ماعنديش مشكلة والله العظيم، بس بقول لازم تحتفظ بهوية نادي الزمالك، وكيان أي نادي بجماهيره ورموزه”.
