أثار الكابتن مصطفى يونس، نجم الأهلي السابق، موجة من الجدل بعد تصريحاته النارية عبر برنامج “الكلاسيكو” مع الإعلامية سهام صالح على قناة “أون”، والتي كشف خلالها عن كواليس صادمة تتعلق برحيل نجله من قطاع الناشئين بالنادي الأهلي، مشيرًا إلى أن القرار جاء بناءً على “تعليمات عليا”، وأنه شخصيًا أصبح غير مرغوب في وجوده داخل جدران النادي.
وقال يونس: “فتحي مبروك مشي ابني من الأهلي بتعليمات.. وأنا موجود في النادي حد قالي يا كابتن دول جابوا 3 لعيبة في قطاع الناشئين بـ10 مليون جنيه السنة اللي فاتت ومشوهم السنة دي، ودي رابع مرة!”
وأضاف: “كلمت فتحي مبروك وإكرامي وقلت لهم كذا وكذا، بس مينفعش أقول الكلام ده على الهواء. بعدها لقيت أحمد سراج، المدرب، بيكلمني الصبح وقالي: والله يا كابتن مليش دعوة، جتلي تعليمات، وقالولي مشي ابن مصطفى يونس من النادي”.
وعندما سألته سهام صالح عن مصدر هذه التعليمات، رد يونس ساخرًا: “هيكون تعليمات من مين؟ أمي يعني!”
وأوضح الكابتن مصطفى يونس أنه لم يعد مرحبًا به داخل الأهلي: “أروح فين؟ هما مش عايزيني أدخل النادي أصلًا، علشان وجودي بيخلي ناس تحكيلي حاجات بتحصل جوه، وهما مش عايزين الكلام ده يطلع. أنا مصطفى يونس، مش أنا اللي أروح لحد أقوله عملت ليه كده”.
واختتم تصريحاته بتوجيه اتهامات صريحة بالمجاملات داخل القطاع، قائلًا: “ابن مدير البنك الفلاني وابن الراجل اللي ماسك المكان الفلاني هما اللي بيلعبوا.. إحنا لا كسبنا بطولة ولا طلعنا حد أصلًا”.
