وجّه أحمد سيد زيزو، لاعب الأهلي الحالي والزمالك السابق، رسالة مطولة عبر حسابه الرسمي على موقع “إنستجرام”، عبّر خلالها عن استيائه من موجات السباب والتنمر والخوض في الأعراض، والتي أصبحت منتشرة بشكل لافت في الفترة الأخيرة، متسائلًا عن جدوى كل هذا السلوك وأثره الحقيقي على من يقوم به.
وقال زيزو: “السؤال الوحيد والأوحد اللي مش عايز يطلع من دماغي ونفسي ألاقي له إجابة! هو بجد لما حد يخوض في عرض الناس ويقعد يشتم فيهم ويسب ويتنمر، دا بيعود ولا بيرجع عليه بإيه؟ هل بيروح البيت بيلاقي بيته اتغير؟ طيب بيبص تحت بيته بيلاقي العربية اللي نفسه يجيبها؟”.
وتابع: “طيب ولاده وصلوا للمكانة اللي بيتمناها؟ طيب عاش أبوه وأمه في حاجة يستحقوها؟ مش قادر أستوعب فعلاً الموضوع. بلاش أنت، هل اللي بتخوض في عرضه دا وبتشتمه وبتتنمر عليه، بيصحى بعد شتيمتك دي مش شغال نفس الشغلانة؟ معندوش نفس البيت؟ طب والعربية؟ حياتكم يعني اتغيرت؟ الإجابة: لا!”.
وأضاف زيزو في رسالته: “طيب ليه بتعمل كده؟ عمال تكبر وتكثر في ذنوب، الله أعلم هتعرف تمسحهم ولا لا، ومفيش حاجة على أرض الواقع بتتغير بعد الشتيمة دي كلها!”.
وأردف: “مش بتشوف كل الناس اللي فجأة مبقوش حواليك؟ دي مش حاجة تخليك تتعظ! تخليك تفكر: أنا بعمل كده ليه؟ وعشان إيه؟ فكر كويس عشان والله مافيش حاجة مستاهلة”.
واختتم زيزو رسالته بتوجيه دعوة للتفكر في الأرزاق والنية الصافية قائلاً: “اعرف إن رزقك كده كده ربنا كاتبه لك، وانت بتختار الطريقة اللي بيجيلك بيها الرزق، فخليها دايمًا طريقك كويسة، وافتكر دايمًا إنها مش دايمة… صباحكم جميل”.
