وجّه الإعلامي كريم حسن شحاتة رسالة مباشرة لإدارات الأهلي والزمالك بسبب ظاهرة الإعلانات التقديمية للاعبين الجدد، والتي تتضمن “إسقاطات” على النادي المنافس، مؤكدًا ضرورة احترام كل نادٍ للآخر.
وقال كريم خلال ظهوره على قناة الحياة: “إعلان تقديم أحمد شريف حلو، لكن يا جماعة بلاش موضوع البلالين الحمراء والرمزيات اللي كأنها إسقاط على الأهلي. أحمد طلع بلونة حمرا ورماها بعيد، طب ليه؟ بلاش إثارة”.
وأضاف: “قبل كده الأهلي عمل إعلان جايب واحد مجنون لابس أبيض وفيه خطين حُمر وجايبين عربية إسعاف… برضه قلت مينفعش. والإسقاط واضح، ووقتها انتقدته بشدة”.
وتابع: “الزمالك كمان عمل فيديو قبل كده بيضرب النسر بسهم، ووقتها برضه قلت لأ، دي مش حاجة نضحك عليها، دي حاجات بتزود التعصب بين الجماهير”.
وأكد كريم: “الإعلان ده ممكن يعدي عادي لإنه خفيف، لكن أنا بقول أهو، بلاش تاني. كل نادي يحترم التاني. اعمل إعلان مبهج، قدم اللاعب بطريقة كويسة، من غير ما تمس المنافس”.
واختتم حديثه قائلاً: “الرسالة واضحة، الكرة متعة ومنافسة شريفة، وخلوا الجماهير تتفرج على حاجة تفرح، مش حاجة تزود الشحن”.
