“مش مدير كورة ولا إداري.. لكن هقول رأيي بصراحة علشان الزمالك”.. طارق يحيى يُطلق تصريحات نارية! فيديو
في رسالة واضحة وصريحة، أكد الكابتن طارق يحيى، نجم الزمالك الأسبق، أنه لا يسعى وراء المناصب أو المصالح الشخصية، وأن كل تصريح يدلي به ينبع فقط من حرصه على مصلحة النادي، وليس لهدف آخر.
وقال طارق يحيى في تصريحات عبر إذاعة “أون سبورت إف إم”: “الهجوم عليا بسبب حديثي عن أبناء النادي؟ الحاجات اللي اتكلمت فيها اصلا مش كاريري .. أنا لا مش مدير كورة ولا اداري ولا عامل غرف خلع الملابس ولا اي منصب من دول أنا بتكلم عن مصلحه النادي ومش مستفيد حاجه من الكلام ده”.
وتابع: “أنا معنديش اعتراض على تواجد جون إدوارد لانه شخص فاهم في الحته دي ومنصب المدير الرياضي وهنسانده كلنا، لكن لما حد يسألني على رأيك في تعيين مع احترامي عبدالناصر محمد أو غيره من خارج أبناء النادي .. لازم أقول رأيي بصراحه مش هكدب”.
وأضاف: “في ناس بتقولي اطلع قول حاجات على الشاشه عكس اللي جواك أو اللي بتقولها في الكواليس.. أنا بقول رأيي الحقيقي .. مش بنافق السوشيال ميديا”.
واستمر: “لما اجي أعين مدير الكرة من برا أبناء الزمالك.. أبناء الزمالك عمرهم ما حاربوا حد ولن يحاربوا اي بني ادم وكلنا مع الزمالك واي شخص، واحد يقولك انتوا ليه مكنتوش بتتكلموا ايام المجلس السابق … لأ حضرتك كنا بنتكلم أنت اللي مكنتش بتتكلم، حنا كنا شغالين جوا النادي وكنا بنتكلم وكنا بنشتغل في هذه الأجواء الغير مستقره والمتوترة وكنا بنعترض على قرارات كتيره .. حضرتك كنت فين؟”.
واستكمل: “لما كنا نيجي نقول لحد تعالى اتكلم في القناة يقولك لا أنا البعبع هياكلني.. انا كنت شغال مع البعبع وكنت عامل شغل الحمدلله .. أنا كنت جرئ وبشتغل وبنجز حاجات للزمالك.. أنا عملت قطاع للناشئين لعشر سنين قدام وللاسف راح كله .. فين اسامه فيصل وفين حسين فيصل وفين يوسف اسامه نبيه وفين حسام عبدالمجيد وفين ماجد هاني وفين علاء .. وغيرهم أنا اللي مصعد كل الناس دي”.
وأردف: “أنا حققت أعلى نتيجة لاي فريق مصري خارج القطر المصري في دوري أبطال أفريقيا.. كسبت فريق ديكاداها الصومالي 7ـ0 .. حد هيقولي دي المباراة اتنقلت لمصر .. هقولك ما الزمالك خرج قبل كده من الفريق الاثيوبي في مصر والأهلي كذلك .. لكن تاريخياً بيقال أن الزمالك حقق رقم قياسي بالفوز 7-0 على ديكاداها خارج الأرض ودي أنا اللي عملتها واتكتبت في تاريخي”.
واختتم: “أنا زملكاوي وبحب الزمالك وغيور على النادي وكلامي علشان الكيان لان كيان اي نادي من جماهيره ورموزه”.
