قال الكابتن مصطفى يونس خلال ظهوره في برنامج “الكلاسيكو” مع الإعلامية سهام صالح على قناة “أون” إنه ضد انضمام زيزو للنادي الأهلي، رغم إنه شايفه لاعب كبير، لكن مش كل حاجة المكسب.
وأضاف: “أنا كأهلاوي ميسعدنيش إن زيزو يكون في الفريق حتى لو هيكسبني.. والناس كتير وافقتني وقالولي عندك حق، وكل يوم بيطلع كلام جديد، اللي يقول مضى من سنة ونص، واللي يقول كوبري”.
وكشف يونس مفاجأة لأول مرة وقال: “والله لما زيزو وقع في ماتش الزمالك وادعى الإصابة، قولت ده مضى ووقع مع الأهلي.. وده الإحساس اللي بيجيلنا كلعيبة، السنس بيقولك دي مش إصابة حقيقية”.
وأكد إنه سبق وقال في قناة الزمالك وقت قصة إمام عاشور: “لو ما رجعش الأهلي ابقى قولولي”، وبالفعل رجع، وقال كمان: “هو لازم نكذب وننافق علشان الناس ترضى؟ أنا بتكلم بإحساسي”.
واختتم مصطفى يونس كلامه برسالة قوية: “أنا اتعلمت في الأهلي إن 60 أو 70% من الفريق لازم يكون من ولاد النادي.. لكن اللي بيحصل في السنين اللي فاتت ده، أنا مش راضي عنه خالص”.
