كشف وائل القباني، مدير الكرة السابق بنادي الزمالك، كواليس توزيع مبلغ 15 مليون جنيه على لاعبي الفريق قبل مباراة نهائي كأس مصر، مؤكدًا استثناء ثلاثة لاعبين من الحصول على أي جزء من هذه الأموال.
وقال القباني خلال ظهوره ببرنامج “الكابتن” مع أحمد حسن عبر قناة dmc: “المجلس وفر 15 مليون جنيه، وقالولي وزعهم زي ما أنت عايز، فبدأت برواتب الجهاز الفني، وبعدها شهرين بدل سكن للمغتربين، وكمان ميلا عامل المهمات خصصت له مكافأة الكأس هو وكل العمال”.
وأضاف: “دفعت تكاليف سفر حمدي والمثلوثي، وفضل 12 مليون وزعتهم على اللاعبين كجزء من عقودهم، ماعدا تلاتة ماخدوش حاجة: محمود الونش، عبد الله السعيد، ومحمد شحاتة”.
وتابع: “القرار كان عادل لأن الونش حصل على 51% من عقده، وشحاتة وعبد الله حصلوا على نسبة أعلى من الباقي، كلمت شحاتة وقاللي معاك يا كابتن، والونش تفهم الموقف، أما السعيد فهو محترم لكن مجاش يتكلم”.
واختتم القباني حديثه قائلاً: “قلت للونش أنت لسه مجدد وحصلت على مبلغ محترم، وهو احترم اللي قلته ومكانش عنده مشكلة”.
